കോഴിക്കോട്: റമദാന്‍ മാസത്തില്‍ സുപ്രഭാതം ഓണ്‍ലൈന്‍ ഹുദൈബിയ ഉംറ ഗ്രൂപ്പുമായി ചേർന്ന് സംഘടിപ്പിച്ച രിഹ്‌ലത്തുന്‍ മഅല്‍ ഖുര്‍ആന്‍ ഓണ്‍ലൈന്‍ വിജ്ഞാന പരീക്ഷാ ഫലം പ്രഖ്യാപിച്ചു. വിജയിയെ സുപ്രഭാതം റസിഡന്റ് എഡിറ്റര്‍ സത്താര്‍ പന്തല്ലൂര്‍ നറുക്കെടുപ്പിലൂടെ തിരഞ്ഞെടുത്തു. വിജയിയായ മിദ്‌ലാജ് നീലഗിരിക്ക് സൗജന്യമായി ഉംറ ചെയ്യാന്‍ അവസരം ലഭിക്കും.

ചടങ്ങില്‍ ഹുദൈബിയ ഹജ്ജ് ആന്‍ഡ് ഉംറ ഗ്രൂപ്പ് ചീഫ് അമീര്‍ അബ്ദുറസാഖ് ബുസ്താനി, എം.ഡി പി.പി ജാബിര്‍, സുപ്രഭാതം ഡി.ജി.എം (മാര്‍ക്കറ്റിങ്) രാജീവ്, പര്‍ച്ചേസ് മാനേജര്‍ സുഹൈല്‍ ദാരിമി, ഓണ്‍ലൈന്‍ ഹെഡ് മൂജീബ് ഫൈസി, ന്യൂസ് കോഡിനേറ്റര്‍ ടി.കെ ജോഷി, റാഷിദ് കെ.വി.ആര്‍ എന്നിവര്‍ സന്നിഹിതരായി.

ക്വിസ് മത്സരത്തിലും ഖുര്‍ആന്‍ വിജ്ഞാന പരീക്ഷയിലും ദിനേന തെരഞ്ഞെടുക്കപ്പെട്ട വിജയികള്‍ക്ക് പ്രത്യേക പ്രോത്സാഹന സമ്മാനം ലഭിക്കും. അതാത് ദിവസത്തെ വിജയികളുടെ വിവരങ്ങൾ സുപ്രഭാതം വെബ്‌സൈറ്റിൽ പ്രസിദ്ധീകരിച്ചിട്ടുണ്ട്.