എടപ്പാള്‍: നിയന്ത്രണം വിട്ട ബൈക്ക് വഴിയാത്രക്കാരെ ഇടിച്ച് മറിഞ്ഞ് നാല് പേര്‍ക്ക് പരുക്കേറ്റു. വഴിയാത്രക്കാരായ കാലടി പഞ്ചായത്ത് അംഗം ബാബുരാജ്(56), പെട്രോള്‍ പമ്പ് ജീവനക്കാരി ഷൈലജ(49), ബൈക്ക് യാത്രികരായ മാണൂര്‍ സ്വദേശികളായ ഫാറൂഖ്(22), ഫൈസല്‍(22) എന്നിവര്‍ക്കാണ് പരുക്കേറ്റത്.
ഗുരുതരമായി പരുക്കേറ്റ ഫൈസലിനെ തൃശൂരിലെ സ്വകാര്യ ആശുപത്രിയിലും മറ്റുള്ളവരെ എടപ്പാളിലെ സ്വകാര്യ ആശുപത്രിയിലും പ്രവേശിപ്പിച്ചു. ഇന്നലെ രാത്രി എട്ടിന് അണ്ണക്കംമ്പാട് തൃക്കോവില്‍ ക്ഷേത്രത്തിന് സമീപത്താണ് അപകടം നടന്നത്.
പെട്രോള്‍ പമ്പ് ജീവനക്കാരി ഷൈലജ ജോലികഴിഞ്ഞ് മടങ്ങുകയും പെട്രോള്‍ പമ്പ് ജീവനക്കാരന്‍ കൂടിയായ ബാബുരാജ് പമ്പിന് സമീപം നില്‍ക്കുകയും ചെയ്യുമ്പോള്‍  ബൈക്ക് ഇവര്‍ക്കിടയിലേക്ക്  പാഞ്ഞ് കയറുകയായിരുന്നു.