നെടുങ്കണ്ടം: കഞ്ചാവുമായി രണ്ട് യുവാക്കള്‍ കമ്പംമെട്ട് എക്‌സൈസ് ചെക്ക്‌പോസ്റ്റില്‍ അറസ്റ്റില്‍. വൈക്കം സ്വദേശികളായ കാട്ടിത്തറ വീട്ടില്‍ സുനില്‍ (39), തെക്കേമച്ചിങ്കല്‍ വീട്ടില്‍ സരീഷ് (34) എന്നിവരാണ് പിടിയിലായത്. ഇവരില്‍ നിന്നും ഒരു കിലോ നൂറ് ഗ്രാം കഞ്ചാവ് പിടിച്ചെടുത്തു. തമിഴ്‌നാട് ഗൂഢല്ലൂരില്‍ നിന്നും 15,000 രൂപയ്ക്ക് കഞ്ചാവ് വാങ്ങിയതാണെന്നും വൈക്കത്ത് കൊണ്ട്‌പോയി ചെറുപൊതികളാക്കി വില്‍പ്പന നടത്തുകയായിരുന്നു പദ്ധതി എന്നും പ്രതികള്‍ ഉദ്യോഗസ്ഥര്‍ക്ക് മൊഴി നല്‍കി. വൈക്കത്ത് വിദ്യാര്‍ഥികള്‍ക്ക് കഞ്ചാവ് വില്‍ക്കുന്ന പ്രധാന കച്ചവടക്കാരാണ് പിടിയിലായവര്‍. ഇവര്‍ക്ക് കഞ്ചാവ് നല്‍കിയ ആളെ കണ്ടെത്തുവാനുള്ള അന്വേഷണം ആരംഭിച്ചതായി എക്‌സൈസ് ഉദ്യോഗസ്ഥര്‍ പറഞ്ഞു. പ്രതികളെ ഉടുമ്പന്‍ചോല എക്‌സൈസ് സര്‍ക്കിള്‍ ഓഫിസില്‍ ഹാജരാക്കി കേസ് രജിസറ്റര്‍ ചെയ്തു. തുടര്‍ന്ന് നെടുങ്കണ്ടം ഒന്നാം ക്ലാസ് മജിസ്‌ട്രേറ്റ് കോടതിയില്‍ ഹാജരാക്കി റിമാന്‍ഡ് ചെയ്തു.
കമ്പംമെട്ടില്‍ എക്‌സൈസ് - പൊലിസ് -ഫോറസ്റ്റ് ഉദ്യേഗസ്ഥര്‍ സംയുക്തമായാണ് പരിശോധന നടത്തുന്നത്. എക്‌സൈസ് ഇന്‍സ്‌പെക്ടര്‍  ജിജി ഐപ്പ് മാത്യു, അസി.എക്‌സൈസ് ഇന്‍സ്‌പെക്ടര്‍ പി.കെ.സുരേഷ്, സിവില്‍ എക്‌സൈസ് ഓഫിസര്‍മാരായ രാജ്കുമാര്‍. ബി, അനീഷ് റ്റി.എ, തോമസ് ജോണ്‍ സിവില്‍ പൊലിസ് ഓഫിസര്‍ അജീഷ് അലിയാര്‍ എന്നിവര്‍ ചേര്‍ന്നാണ് പ്രതികളെ പിടികൂടിയത്.