ഭുവനേശ്വര്‍: ഒഡിഷയില്‍ കേന്ദ്ര പെട്രോളിയം മന്ത്രി ധര്‍മേന്ദ്ര പ്രധാന്റെ സഹോദരന്റെ പാചക വാതക ഏജന്‍സി ഓഫിസില്‍ വിജിലന്‍സ് റെയ്ഡ്. അഴിമതി വിരുദ്ധ വിജിലന്‍സിന്റെ നേതൃത്വത്തില്‍ സംസ്ഥാനത്തെ വിവിധ പെട്രോള്‍ പമ്പുകളിലും പാചകവാതക ഏജന്‍സികളുടെ ഓഫിസുകളിലും നടത്തിയ റെയ്ഡിന്റെ ഭാഗമായിരുന്നു ഇത്.
പെട്രോളിയം ഉല്‍പന്നങ്ങളിലും പാചക വാതകങ്ങളിലും മായംചേര്‍ക്കുകയും കരിഞ്ചന്തയില്‍ വില്‍ക്കുകയും ചെയ്യുന്നതായി സംസ്ഥാനത്ത് വ്യാപകമായി പരാതി ഉയര്‍ന്നതിന്റെ അടിസ്ഥാനത്തിലാണ് വിജിലന്‍സ് റെയ്ഡ് നടത്തിയത്. ഭുവനേശ്വര്‍, ബെര്‍ഹാംപൂര്‍, ബാല്‍സൂര്‍, കട്ടക്ക്, സമ്പാല്‍പൂര്‍, കോറാപുത്ത്, നവരംഗ്പൂര്‍, പുരി, അംഗുല്‍ തുടങ്ങിയ നഗരങ്ങളിലാണ് റെയ്ഡ് നടന്നതെന്ന് വിജിലന്‍സ് പ്രസ്താവനയിലൂടെ അറിയിച്ചു.
അംഗുല്‍ ജില്ലയിലെ താച്ചറില്‍ കേന്ദ്ര പെട്രോളിയം മന്ത്രി ധര്‍മേന്ദ്ര പ്രധാന്റെ സഹോദരന്‍ നടത്തുന്ന പാചക വാതക ഏജന്‍സിയിലാണ് ആദ്യം റെയ്ഡ് നടന്നത്. ഇവിടെ ക്രമക്കേടുകള്‍ കണ്ടെത്തിയതായും കുറ്റക്കാര്‍ക്കെതിരേ ഉചിതമായി നടപടിയുണ്ടാകുമെന്നും വിജിലന്‍സ് അറിയിച്ചു. സംഭവത്തില്‍ മന്ത്രി പ്രതികരിച്ചിട്ടില്ല. എന്നാല്‍, ബി.ജെ.ഡി സര്‍ക്കാര്‍ വിജിലന്‍സിനെ ദുരുപയോഗിക്കുന്നതിന്റെ വ്യക്തമായ തെളിവാണു സംഭവമെന്ന് ബി.ജെ.പി സംസ്ഥാന ഘടകം ജനറല്‍ സെക്രട്ടറി പ്രിത്വിരാജ് ഹരിചന്ദ്രന്‍ ആരോപിച്ചു.