ലഖ്‌നോ: മഹാത്മാഗാന്ധിയേക്കാള്‍ വലിയ നേതാവായിരുന്നു അംബേദ്കര്‍ എന്ന് എ.ഐ.എം.ഐ.എം അധ്യക്ഷന്‍ അസദുദീന്‍ ഉവൈസി.
മതേതരകാഴ്ചപ്പാടിനൊപ്പം ജാതിവിഭജനമില്ലാത്ത സാമൂഹിക കാഴ്ചപ്പാടും അദ്ദേഹം സ്വീകരിച്ചിരുന്നു. അതുകൊണ്ടാണ് അദ്ദേഹം മഹാത്മാഗാന്ധിയേക്കാള്‍ വലിയ നേതാവെന്ന് അഭിപ്രായപ്പെടാന്‍ കാരണമെന്നും ഉവൈസി വ്യക്തമാക്കി. തെരഞ്ഞെടുപ്പ് പ്രചാരണവുമായി ബന്ധപ്പെട്ട് ഉത്തര്‍പ്രദേശില്‍ സംഘടിപ്പിച്ച പൊതുസമ്മേളനത്തില്‍ സംസാരിക്കുകയായിരുന്നു അദ്ദേഹം.
മഹാത്മാ ഗാന്ധിയുടെ അനുയായി എന്ന നിലയിലാണ് ഖാദി ആന്റ് വില്ലേജ് ഇന്‍ഡസ്ട്രീസ് പുറത്തിറക്കിയ കലണ്ടറില്‍ നൂല്‍നൂല്‍ക്കുന്ന മോദിയുടെ ചിത്രം വച്ചിരിക്കുന്നത്. എന്നാല്‍ അവസരം കിട്ടിയാല്‍ മഹാത്മാഗാന്ധിക്കുപകരം രാഷ്ട്രപിതാവായി മോദി രംഗത്തുവരാനിടയുണ്ടെന്നും അദ്ദേഹം പരിഹസിച്ചു.
നോട്ട് അസാധുവാക്കല്‍ മോദി രാജ്യത്തെ പാവപ്പെട്ട ജനങ്ങള്‍ക്കെതിരായി നടത്തിയ യുദ്ധമായിരുന്നുവെന്നും ഉവൈസി ആരോപിച്ചു. പിതാവിനും പുത്രനും പരസ്പരം വിശ്വാസം നഷ്ടപ്പെട്ടതാണ് സമാജ് വാദി പാര്‍ട്ടിയില്‍ രൂപപ്പെട്ട പ്രതിസന്ധിയ്ക്കു കാരണമെന്നും ഉവൈസി പറഞ്ഞു.