കാക്കനാട്: റേഷന്‍, ക്ഷേമ പെന്‍ഷന്‍ വിതരണത്തിലെ അട്ടിമറിയില്‍ പ്രതിഷേധിച്ച് മുസ്‌ലിം യൂത്ത്‌ലീഗ് ഇന്ന് കലക്ടറേറ്റ് മാര്‍ച്ച് നടത്തും. സംസ്ഥാന വ്യാപകമായി നടത്തുന്ന സമരത്തിന്റെ ഭാഗമായാണ് ജില്ലയിലും മാര്‍ച്ച് സംഘടിപ്പിച്ചിരിക്കുന്നതെന്ന് യൂത്ത്‌ലീഗ് ജില്ലാ പ്രസിഡന്റ് വി.ഇ അബ്ദുല്‍ ഗഫൂര്‍, ജനറല്‍ സെക്രട്ടറി കെ.എ മുഹമ്മദ് ആസിഫ് എന്നിവര്‍ വാര്‍ത്താ സമ്മേളനത്തില്‍ അറിയിച്ചു.
മനുഷ്യാവകാശ പ്രവര്‍ത്തരെ പോലും കരിനിയമങ്ങള്‍ ചുമത്തി പൊലിസ് നടത്തുന്ന നരനായട്ടിനെതിരെയുള്ള പ്രതിഷേധം കൂടിയാണ് കലക്ടറേറ്റ് മാര്‍ച്ച്.
രാവിലെ 10ന് എന്‍.ജി.ഒ ക്വാര്‍ട്ടേഴ്‌സില്‍ നിന്ന് യുവജന മാര്‍ച്ച് ആരംഭിക്കും. തുടര്‍ന്ന് സിവില്‍ സ്റ്റേഷന്‍ കവാടത്തില്‍ നടക്കുന്ന ഉപരോധം മണ്ണാര്‍ക്കാട് എം.എല്‍.എ എന്‍ ഷംസുദ്ദീന്‍ ഉദ്ഘാടനം ചെയ്യും.
സിയാദ് ഇടുക്കി, എം.പി അബ്ദുല്‍ ഖാദര്‍, കെ.എം അബ്ദുല്‍ മജീദ് തുടങ്ങിയവര്‍ പ്രസംഗിക്കും. യൂത്ത് ലീഗ് തൃക്കാക്കര മുന്‍സിപ്പല്‍ പ്രസിഡന്റ് പി.എം മാഹിന്‍കുട്ടി, ജനറല്‍ സെക്രട്ടറി കെ.എന്‍ നിയാസ് എന്നിവര്‍ വാര്‍ത്താ സമ്മേളനത്തില്‍ സംബന്ധിച്ചു.