തിരുവനന്തപുരം: സംസ്ഥാന കോണ്‍ഗ്രസില്‍ മഞ്ഞുരുകിയെന്ന സൂചനയുമായി കെ.പി.സി.സി ആസ്ഥാനത്ത് കോണ്‍ഗ്രസ് നേതാക്കളുടെ കൂടിക്കാഴ്ച . മുന്‍ മുഖ്യമന്ത്രി ഉമ്മന്‍ചാണ്ടി, പ്രതിപക്ഷനേതാവ് രമേശ് ചെന്നിത്തല, കെ.പി.സി.സി അധ്യക്ഷന്‍ വി.എം സുധീരന്‍ എന്നിവരാണ് എ.ഐ.സി.സി നിരീക്ഷകന്‍ കെ.വി തങ്കബാലുവിന്റെ സാന്നിധ്യത്തില്‍ കൂടിക്കാഴ്ച നടത്തിയത്. നോട്ട് പ്രതിസന്ധി വിഷയത്തില്‍ തുടര്‍ പരിപാടികളാണ് യോഗത്തില്‍ ചര്‍ച്ച ചെയ്തത്. സംസ്ഥാനത്തെ കോണ്‍ഗ്രസിലെ പ്രശ്‌നങ്ങള്‍ അവസാനിച്ചെന്ന് വി.എം സുധീരനും പ്രതികരിച്ചു. ഡി.സി.സി അധ്യക്ഷ നിയമനത്തെ ചൊല്ലി എ.ഐ.സി.സി, കെ.പി.സി.സി നേതൃത്വവുമായി ഇടഞ്ഞു നിന്ന ഉമ്മന്‍ചാണ്ടിയെ കഴിഞ്ഞ ദിവസം ഡല്‍ഹിയിലേക്ക് വിളിച്ചുവരുത്തി കോണ്‍ഗ്രസ് ഉപാധ്യക്ഷന്‍ കൂടിക്കാഴ്ച നടത്തിയിരുന്നു.