തിരുവനന്തപുരം: റിപബ്ലിക് ദിനത്തില്‍ ജില്ലാ കലക്ടര്‍മാര്‍ ഗ്രാമസഭ വിളിച്ചു ചേര്‍ക്കണമെന്ന നീതി ആയോഗിന്റെ നിര്‍ദേശം സംസ്ഥാന സര്‍ക്കാര്‍ തള്ളി. ത്രിതല സംവിധാനത്തിന്റെ അധികാരത്തില്‍ കേന്ദ്ര സര്‍ക്കാരിന്റെ കടന്നുകയറ്റം അനുവദിക്കില്ലെന്ന നിലപാടിലാണ് സര്‍ക്കാര്‍. കഴിഞ്ഞ പതിനൊന്നിനാണ് നീതിആയോഗ് എക്‌സിക്യൂട്ടീവ് ഓഫിസര്‍ അമിതാഭ്കാന്ത് എല്ലാ ജില്ലാ കലക്ടര്‍മാര്‍ക്കും കത്തയച്ചത്. റിപബ്ലിക് ദിനത്തില്‍ അതാതു ജില്ലകളില്‍ ഗ്രാമസഭകള്‍ വിളിച്ചു കൂട്ടി അടുത്ത അഞ്ചു വര്‍ഷത്തെ പദ്ധതികള്‍ തീരുമാനിച്ച് നല്‍കണമെന്നാണ് നീതി ആയോഗ് നിര്‍ദേശിച്ചിരുന്നത്.
മാര്‍ച്ച് 31നാണ് പ്രധാനമന്ത്രി അടുത്ത പതിനഞ്ചു വര്‍ഷത്തെ പദ്ധതി പ്രഖ്യാപിക്കുന്നത്. മൂന്നുവര്‍ഷം നടപ്പിലാക്കേണ്ടതും അഞ്ചു വര്‍ഷം കടക്കാത്തതുമായ വികസന പദ്ധതികളാണ് നീതി ആയോഗ് ആവശ്യപ്പെട്ടത്. പ്രധാനമന്ത്രിയുടെ സിറ്റിസണ്‍ വിഷന്‍ ഓഫ് ഇന്ത്യ എന്ന പദ്ധതി നടപ്പിലാക്കാനാണ് പ്രത്യേക ഗ്രാമസഭയെന്നും നീതി ആയോഗ് അറിയിച്ചിരുന്നു. സംസ്ഥാന സര്‍ക്കാരിനോട് ആലോചിക്കാതെയുള്ള നീതി ആയോഗിന്റെ തീരുമാനം ഫെഡറല്‍ സംവിധാനത്തെത്തന്നെ അട്ടിമറിക്കുന്ന നിലപാടാണെന്ന് ഇന്നലത്തെ മന്ത്രിസഭായോഗത്തില്‍ അഭിപ്രായമുയര്‍ന്നു.
ജില്ലാ കലക്ടര്‍മാര്‍ക്ക് ഗ്രമസഭകള്‍ നേരിട്ട് വിളിക്കാന്‍ അധികാരമില്ല. ഒഴാഴ്ച മുമ്പ് അറിയിച്ച് പ്രത്യേക ഗ്രാമസഭ കൂടണമെന്ന തീരുമാനം ത്രിതല സംവിധാനത്തെത്തന്നെ അട്ടിമറിക്കാനാണെന്നാണ് സര്‍ക്കാരിന്റെ വിലയിരുത്തല്‍. ഗ്രാമസഭകള്‍ വിളിച്ചാല്‍ സഹകരിക്കേണ്ടെന്ന് എല്ലാ തദ്ദേശ സ്ഥാപനങ്ങള്‍ക്കും സര്‍ക്കാര്‍ നിര്‍ദേശം നല്‍കി. പ്രതിപക്ഷവും ഇക്കാര്യത്തില്‍ സര്‍ക്കാരിനൊപ്പമാണ്.