ന്യൂഡല്‍ഹി: മുതിര്‍ന്ന കോണ്‍ഗ്രസ് നേതാവ് നാരായണ്‍ ദത്ത് തിവാരിയും മകന്‍ രോഹിത് ശേഖറും ബി.ജെ.പിയില്‍ ചേര്‍ന്നു. പാര്‍ട്ടി ദേശീയാധ്യക്ഷന്‍ അമിത്ഷായുടെ വസതിയിലെത്തിയാണ് ഇരുവരും ബി.ജെ.പിയില്‍ അംഗത്വമെടുത്തത്. ഉത്തര്‍പ്രദേശ്, ഉത്തരാഖണ്ഡ് സംസ്ഥാനങ്ങളില്‍ മുഖ്യമന്ത്രിയായിരുന്നു 91 വയസുകാരനായ എന്‍.ഡി തിവാരി.
മകന്‍ രോഹിത് ശേഖറിന് ഉത്തരാഖണ്ഡ് നിയമസഭാ തെരഞ്ഞെടുപ്പില്‍ സീറ്റ് ഉറപ്പു നല്‍കിയതോടെയാണ് ബി.ജെ.പിയിലേക്കുള്ള അദ്ദേഹത്തിന്റെ കൂടുമാറ്റം. ആറു വര്‍ഷത്തെ നിയമ യുദ്ധത്തിനു ശേഷം മൂന്നു വര്‍ഷം മുമ്പാണ് രോഹിതിനെ മകനായി അദ്ദേഹം അംഗീകരിച്ചത്.
അടുത്തമാസം തെരഞ്ഞെടുപ്പ് നടക്കുന്ന ഉത്തരാഖണ്ഡിലെ ബ്രാഹ്മണ വോട്ടുകള്‍ ലക്ഷ്യം വച്ചാണ് ബി.ജെ.പിയുടെ നീക്കം.
1990കളില്‍ പ്രധാനമന്ത്രിയാകാന്‍ വരെ സാധ്യത കല്‍പ്പിച്ചിരുന്ന തിവാരി 1994ല്‍ കോണ്‍ഗ്രസ് വിട്ട് അര്‍ജുന്‍ സിങ്ങുമായി ചേര്‍ന്ന കോണ്‍ഗ്രസ് (തിവാരി) എന്ന പുതിയ പാര്‍ട്ടി രൂപീകരിച്ചിരുന്നു.
പിന്നീട് സോണിയ ഗാന്ധിയെ അധ്യക്ഷയായി അംഗീകരിച്ച് കോണ്‍ഗ്രസിലേക്ക് തന്നെ തിരിച്ചു വരികയായിരുന്നു. തിവാരി ബി.ജെ.പിയില്‍ ചേര്‍ന്നതോടെ ഉത്തരാഖണ്ഡില്‍ വലിയ സാധ്യതയാണ് ബി.ജെ.പി ലക്ഷ്യം വയ്ക്കുന്നത്.