ന്യൂയോര്‍ക്ക്: രണ്ടുപതിറ്റാണ്ടിനു ശേഷം അമേരിക്കയില്‍ ഹിസ്പാനിക് പ്രാതിനിധ്യം ഇല്ലാതെ കാബിനറ്റിന് ട്രംപ് രൂപം നല്‍കി. അമേരിക്കയിലെ ജനസംഖ്യയില്‍ രണ്ടാംസ്ഥാനത്തു നില്‍ക്കുന്ന ഹിസ്പാനിക്ക് വംശജര്‍ക്കു പ്രാതിനിധ്യം നല്‍കാതെ കാബിനറ്റ് പൂര്‍ത്തിയാക്കുന്നതില്‍ നാഷനല്‍ ഹിസ്പാനിക്ക് ലീഡര്‍ഷിപ്പ് ചെയര്‍മാന്‍ ഹെകുര്‍ സാഞ്ചസ് ഉല്‍കണ്ഠയും നിരാശയും രേഖപ്പെടുത്തി.പതിനാറു കാബിനറ്റ് പദവികള്‍ ഉള്ളതില്‍ ജനസംഖ്യയില്‍ 17 ശതമാനം വരുന്ന ലാറ്റിനോസിനെ ഇതുവരെ ഉള്‍പ്പെടുത്തിയിട്ടില്ല. ഒരു കാബിനറ്റ് റാങ്ക് ഒഴിഞ്ഞുകിടക്കുന്നതില്‍ കാലിഫോര്‍ണിയ ലഫ്റ്റനന്റ് ഗവര്‍ണര്‍ ഏബല്‍ മല്‍ഡോനാഡൊറയെ നിയമിക്കുമെന്നാണു പ്രതീക്ഷയെന്ന് ഹെകൂര്‍ പറഞ്ഞു. 1988നു ശേഷം നിലവില്‍വന്ന എല്ലാ കാബിനറ്റുകളിലും കുറഞ്ഞതു ഒരാളെങ്കിലും ഉണ്ടായിരുന്നു. 1988ല്‍ റൊണാള്‍ഡ് റീഗന്‍ എജുക്കേഷന്‍ സെക്രട്ടറിയായി ലോറ്റാകവോസിനെ നിയമിച്ചിരുന്നു.ഒബാമയുടെ എട്ടു വര്‍ഷ ഭരണത്തില്‍ ആറ് കാബിനറ്റ് പദവികളില്‍ ലാറ്റിനോസിനെ നിയമിച്ചിരുന്നു. വൈസ് പ്രസിഡന്റിനെ കൂടാതെ 15 എക്‌സിക്യൂട്ടിവ് അംഗങ്ങളാണ് കാബിനറ്റില്‍ ഉള്‍പ്പെടുന്നത്. അഗ്രികള്‍ച്ചര്‍, കൊമേഴ്‌സ്, പ്രതിരോധം, വിദ്യാഭ്യാസം ,ഊര്‍ജം, ആരോഗ്യവും മാനുഷിക സേവനവും, ആഭ്യന്തര സുരക്ഷ, ഹൗസിങ് ആന്റ് അര്‍ബന്‍ ഡവലപ്‌മെന്റ്, ആഭ്യന്തരം, തൊഴില്‍, സ്റ്റേറ്റ്, ഗതാഗതം, ട്രഷറി, വെറ്ററന്‍സ് അഫയേഴ്‌സ്, അറ്റോര്‍ണി ജനറല്‍ ഭരണ നിര്‍വഹണത്തില്‍ ഇവരാണ് പ്രസിഡന്റിനാവശ്യമായ ഉപദേശങ്ങള്‍ നല്‍കുക.