ലണ്ടന്‍: എണ്ണവില ഉയര്‍ന്ന് വീപ്പയ്ക്ക് 50 ഡോളറായി. ഈവര്‍ഷം ആദ്യമായാണ് 50 ഡോളറില്‍ എണ്ണവില എത്തുന്നത്. ഉല്‍പ്പാദനം കുറച്ചതും വിപണിയിലെ ആവശ്യം വര്‍ധിച്ചതുമാണ് കാരണം. കഴിഞ്ഞ ദിവസം ക്രൂഡ് ഓയിലിന് 50.22 ഡോളറായിരുന്നു അന്താരാഷ്ട്ര വിപണിയില്‍ വില രേഖപ്പെടുത്തിയത്. കഴിഞ്ഞ നവംബറിനു ശേഷം രേഖപ്പെടുത്തിയ ഏറ്റവും ഉയര്‍ന്ന വിലയാണിത്.
കാനഡയിലെ എണ്ണപ്പാടത്തുണ്ടായ തീപിടിത്തത്തെ തുടര്‍ന്നുള്ള സാഹചര്യം വിലകൂടാന്‍ ഇടയാക്കി. 13 വര്‍ഷത്തെ ഏറ്റവും താഴ്ന്ന വിലയായ 28 ഡോളര്‍ കഴിഞ്ഞവര്‍ഷം രേഖപ്പെടുത്തിയിരുന്നു. ഒപെക് രാജ്യങ്ങളും റഷ്യയും ഈയിടെ എണ്ണവില കൂട്ടാനായി ഉല്‍പ്പാദനം കുറയ്ക്കാന്‍ തീരുമാനിച്ചിരുന്നു. ഇറാനും സഊദിയും ഉല്‍പ്പാദനം കൂട്ടിയതാണു വില കുറയാന്‍ കാരണമായിരുന്നത്.