ആലുവ: ചൂണ്ടി, ചുണങ്ങംവേലി ഭാഗങ്ങളില്‍ കഞ്ചാവ് വില്‍പ്പന നടത്തിവന്നിരുന്ന രണ്ടു ഡ്രൈവര്‍മാരെ എക്‌സൈസ് സ്‌പെഷല്‍ സ്‌ക്വാഡ് സി.ഐ പി.എല്‍ ജോസിന്റെ നേതൃത്വത്തിലുള്ള പൊലിസ് സംഘം പിടികൂടി.
150 ഗ്രാം കഞ്ചാവും ഓട്ടോറിക്ഷയും ഇവരുടെ കൈവശം നിന്നും പിടികൂടി.
ഇടുക്കി ഉടുമ്പഞ്ചോല  ആനക്കുഴി കുന്നത്തേട്ട് വീട്ടില്‍ ലിബിന്‍ (21), ആലുവ കീഴ്മാട് സൊസൈറ്റിപ്പടി ഓലിപറമ്പില്‍ വീട്ടില്‍ കൊച്ചുകുഞ്ഞ് എന്ന് വിളിക്കുന്ന രഘു(44) എന്നയാളുമാണ് അറസ്റ്റിലായത്. ക്രെയിന്‍ ഓപ്പറേറ്ററായ ലിബിന്‍, ഓട്ടോ ഡ്രൈവറായ രഘുവിന്റെ കയ്യില്‍ നിന്നും കഞ്ചാവ് വാങ്ങി എറണാകുളം, പാലാരിവട്ടം, കളമശ്ശേരി ഭാഗങ്ങളില്‍ ആവശ്യക്കാര്‍ക്ക് കഞ്ചാവ് ഒരു പൊതിയ്ക്ക് 750 രൂപ നിരക്കില്‍ എത്തിച്ചുകൊടുക്കുകയാണ് പതിവ്. ഇവര്‍ക്ക് കഞ്ചാവ് എത്തിച്ചുകൊടുക്കുന്നവരെ കുറിച്ച് വിവരം ലഭിച്ചിട്ടുണ്ട്.
ആലുവയില്‍ കഞ്ചാവിന്റെ ഉപയോഗം കൂടിവരുന്നതായി അസ്സി. എക്‌സൈസ് കമ്മിഷണര്‍ എ.എസ് രഞ്ജിത്തിന് ലഭിച്ച വിവരത്തിന്റെ അടിസ്ഥാനത്തില്‍ നടത്തിയ റെയ്ഡില്‍ പ്രിവന്റീവ് ഓഫിസര്‍മാരായ വി.എ ജബ്ബാര്‍, പി.കെ ബാലകൃഷ്ണന്‍, സിവില്‍ എക്‌സൈസ് ഓഫിസര്‍മാരായ ജോസ്, ഷിബു, രവി, ജിനേഷ്‌കുമാര്‍, ശശി, മണി, വനിത സിവില്‍ എക്‌സൈസ് ഓഫീസര്‍മാരായ വിജു, ജീമോള്‍ എന്നിവര്‍ റെയ്ഡില്‍ പങ്കെടുത്തു.