കണ്ണൂര്‍: പ്രവാചകപത്‌നി ഖദീജബീവിയുടെ കല്യാണത്തിന് മുപ്പത്തിമുക്കോടി ദൈവങ്ങള്‍ക്കും പ്രാര്‍ഥന. ജാറത്തിലും പുന്നക്കല്‍ ദേവിക്കും നേര്‍ച്ച നേര്‍ന്നും സെന്റ് അന്റോണിയോസ് ദേവാലയത്തില്‍ മെഴുകുതിരി കത്തിച്ചും തോഴിമാര്‍ മണവാട്ടിയെ ആനയിച്ചത് പ്രാര്‍ഥനയുടെ കരുത്തില്‍.

സംസ്ഥാന സ്‌കൂള്‍ കലോത്സവം ഹൈസ്‌കൂള്‍വിഭാഗം ഒപ്പനപ്പാട്ട് വേദിയിലേക്ക് എറണാംകുളം കച്ചേരിപ്പടി സെന്റ് അന്റോണിയോസ് എച്ച്.എസ്.എസ് വിദ്യാര്‍ഥികളുടെ ചെസ്റ്റ് നമ്പര്‍ വിളിക്കുമ്പോഴും വേദിക്കു പിറകില്‍ പ്രാര്‍ഥനയായിരുന്നു. കസവുതട്ടത്തിന്റെ മറവില്‍ മൈലാഞ്ചിയണിഞ്ഞ മണവാട്ടി ഫെബിന അള്ളാഹുവിനോടു കൈ ഉയര്‍ത്തി പ്രാര്‍ഥിച്ചപ്പോള്‍ തൊട്ടുചാരെയിരുന്ന് കൈകൂപ്പി കാവ്യ പ്രാര്‍ഥിച്ചത് പുന്നക്കല്‍ദേവിക്കും പിന്നെ നൂറായിരം ദൈവങ്ങള്‍ക്കുമായിരുന്നു. വലത്തേ അറ്റത്തിരുന്നു കൈചേര്‍ത്തുപിടിച്ച് എയ്ഞ്ചലിന്റെ പ്രാര്‍ഥനയാവട്ടെ സര്‍വശക്തനായ പിതാവും ആകാശത്തിന്റെയും ഭൂമിയുടേയും സൃഷ്ടാവുമായ യേശുദേവനോടായിരുന്നു. പിന്നെ വേദിയില്‍ കണ്ടത് പ്രവാചകന്റെയും പത്‌നി ഖദീജ ബീവിയുടെയും കല്യാണരാവിലെ ഒപ്പനപ്പാട്ടിന്റെ ഈരടികള്‍ക്കനുസരിച്ചുള്ള കൈത്താളങ്ങളാണ്.

മത്സരംകഴിഞ്ഞ് വീണ്ടും വേദിക്കു പിറകിലേക്ക്. വട്ടത്തിലിരുന്ന് കൈകള്‍ ചേര്‍ത്തുപിടിച്ച് നല്ല മത്സരത്തിന് അവസരംതന്ന സകല ദൈവങ്ങള്‍ക്കും വീണ്ടും പ്രാര്‍ഥന നടത്തിയ ശേഷമാണ് വിദ്യാര്‍ഥികള്‍ മാധ്യമങ്ങള്‍ക്കുപോലും മുഖം കൊടുത്തത്. മികച്ച പ്രകടനം കാഴ്ചവയ്ക്കാന്‍ പുന്നക്കല്‍ ദേവിക്കു പുഷ്പ്പാര്‍ച്ചന നടത്തിയാണ് ഇവിടെയെത്തിയതെന്ന് കാവ്യയും ദമ്മനംപള്ളി ജാറത്തില്‍ ശര്‍ക്കരക്കഞ്ഞി വച്ചുകൊടുക്കാനാണ് തന്റെ നേര്‍ച്ചയെന്ന് ഫെബിനയും സെന്റ് അന്റോണിയോസ് പള്ളിയില്‍ മെഴുകുതിരി കത്തിക്കുമെന്ന് എയ്ഞ്ചലും സുപ്രഭാതത്തോടുപറഞ്ഞു. കലാരൂപങ്ങളെ മതങ്ങള്‍ കൈയടക്കുന്ന കാലത്ത് യവനികയ്ക്കു പിറകില്‍ കൈചേര്‍ത്തുപിടിച്ച പ്രാര്‍ഥനയിലൂടെ മതേതരത്വത്തിന്റെ ഇന്ത്യന്‍ മാതൃകയായിരുന്നു ഇന്നലത്തെ കാഴ്ച.