കോഴിക്കോട്: സൗത്ത് സോണ്‍ അന്തര്‍സര്‍വകലാശാല ഫുട്‌ബോള്‍ കിരീടം കാലിക്കറ്റ് സര്‍വകലാശാലയ്ക്ക്. ഗുല്‍ബര്‍ഗയില്‍ നടന്ന ദേശീയ സൗത്ത് സോണ്‍ ചാംപ്യന്‍ഷിപ്പിലാണ് നിലവിലെ റണ്ണറപ്പായ കാലിക്കറ്റ് സര്‍വകലാശാല ടീം ജേതാക്കളായത്.
ലീഗ് അടിസ്ഥാനത്തില്‍ നടന്ന മത്സരത്തില്‍ എതിരില്ലാത്ത രണ്ടു ഗോളിന് നിലവിലെ ജേതാക്കളായ മദ്രാസ് യൂനിവേഴ്‌സിറ്റിയെ പരാജയപ്പെടുത്തിയാണ് കാലിക്കറ്റ് ജേതാക്കളായത്. കെ.എസ് ആഷിക്കും ഇനാസ് റഹ്മാനുമാണ് ഗോളുകള്‍ സ്‌കോര്‍ ചെയ്തത്. കാലിക്കറ്റ് ടീം രണ്ടണ്ട് ജയവും ഒരു സമനിലയുമായി ഏഴ് പോയിന്റുമായാണ് ജേതാക്കളായത്. ക്വാര്‍ട്ടറില്‍ എം.ജിയെ പരാജയപ്പെടുത്തിയാണ് കാലിക്കറ്റ് സെമിയിലെത്തിയത്. ഫെബ്രുവരി 13മുതല്‍ 19വരെ മിഡ്‌നാപൂരില്‍ നടക്കുന്ന അഖിലേന്ത്യ സോണല്‍ ഫുട്‌ബോള്‍ ചാംപ്യന്‍ഷിപ്പില്‍ കാലിക്കറ്റ് മാറ്റുരക്കും. നിലവില്‍ അഖിലേന്ത്യ സര്‍വകലാശാല ഫുട്‌ബോളില്‍ മൂന്നാം സ്ഥനക്കാരായ കാലിക്കറ്റ് 2013-14ല്‍ ജേതാക്കളായിരുന്നു.