തളിപ്പറമ്പ്: തളിപ്പറമ്പ് മദ്‌റസക്ക് സമീപത്തെ ട്രാന്‍സ്‌ഫോര്‍മറിന് തീപിടിച്ചു. ഇന്നലെ ഉച്ചയോടെ തളിപ്പറമ്പ്-ഇരിട്ടി സംസ്ഥാനപാതയില്‍ മദ്‌റസ സ്റ്റോപ്പിന് സമീപം ട്രാന്‍സ്‌ഫോര്‍മറിന് സമീപം തള്ളിയ മാലിന്യത്തില്‍ നിന്നാണ് തീ പടര്‍ന്നത്.
ട്രാന്‍സ്‌ഫോര്‍മറിന്റെ വയറുകളിലേക്ക് പടര്‍ന്നുപിടിച്ച തീയോടൊപ്പം കനത്ത പുകയും പരന്നതോടെ നാട്ടുകാര്‍ പരിഭ്രാന്തരായി. ട്രാന്‍സ്‌ഫോര്‍മര്‍ പൊട്ടിത്തെറിച്ചേക്കുമെന്ന് ഭയന്ന് പ്രദേശത്തുള്ള കച്ചവടക്കാര്‍ കടകളടക്കുകയും ചെയ്തിരുന്നു. തളിപ്പറമ്പ് അഗ്‌നിശമനസേനയെത്തിയാണ് തീയണച്ചത്. വിവരമറിഞ്ഞ് കെ.എസ്.ഇ.ബി അധികൃതരും സ്ഥലത്തെത്തിയിരുന്നു.
ട്രാന്‍സ്‌ഫോര്‍മറിന് കാര്യമായ തകരാറുകള്‍ സംഭവിക്കാത്തതിനാല്‍ ഒരു മണിക്കൂറിനുള്ളില്‍ വൈദ്യുതി വിതരണം പുനസ്ഥാപിച്ചു.