കൊണ്ടോട്ടി: ശ്രീലങ്കന്‍ സ്വദേശിയായ യാത്രക്കാരിക്ക് നെഞ്ചുവേദന അനുഭവപ്പെട്ടതിനെ തുടര്‍ന്ന് കൊളംബോ-അബൂദബി വിമാനം കരിപ്പൂരില്‍ അടിയന്തര ലാന്‍ന്റിങ് നടത്തി. ഇത്തിഹാദ് എയര്‍വേയ്‌സിന്റെ ഇ.വൈ.264 വിമാനമാണ് കരിപ്പൂരിലിറക്കിയത്.
ഇന്നലെ ഉച്ചക്ക് 2.38 നായിരുന്നു സംഭവം. ശ്രീലങ്കയില്‍ നിന്ന് അബൂദബിയിലേക്ക് പറക്കുന്നതിനിടെയാണ് ശ്രീലങ്കന്‍ സ്വദേശിയായ ഉദ്ധത ചാന്തിമ(49)ക്ക് നെഞ്ചുവേദന അനുഭവപ്പെട്ടത്. ഈ സമയം വിമാനം കരിപ്പൂര്‍ വിമാനത്താവളത്തിന്റെ ആകാശ പരിധിയിലായിരുന്നു.
പൈലറ്റ് വിവരം എയര്‍ട്രാഫിക് കണ്‍ട്രോളില്‍ അറിയിച്ചതോടെ വിമാനത്താവള സുരക്ഷാസേനയും എയര്‍ ട്രാഫിക് കണ്‍ട്രോളും അടിയന്തര ലാന്റിങ്ങിനുള്ള സൗകര്യമൊരുക്കി. എമിഗ്രേഷന്‍ നടപടിക്രമങ്ങള്‍ പൂര്‍ത്തിയാക്കി കുറഞ്ഞ സമയത്തിനകം തന്നെ ഇവരെ കൊണ്ടോട്ടിയിലെ സ്വകാര്യ ആശുപത്രിയിലേക്ക് മാറ്റി. രണ്ട് ബന്ധുക്കളും ഇവരുടെ കൂടെയുണ്ടായിരുന്നു. പിന്നീട് വിദഗ്ധ ചികിത്സക്കായി ഇവരെ കോഴിക്കോട്ടെ ആശുപത്രിയിലേക്ക് മാറ്റി. വിമാനം വൈകിട്ട് 3.50ഓടെ കരിപ്പൂരില്‍ നിന്ന് അബൂദബിയിലേക്ക് തിരിച്ചു.