മുക്കം : സമസ്ത കേരള സുന്നി ബാലവേദി (എസ്.കെ.എസ്.ബി.വി ) കുമാരനെല്ലൂര്‍ യൂണിറ്റിന്റെ കുരുന്നുകുട്ടികള്‍ ഇരുവഴിഞ്ഞിപുഴ ശുചീകരിച്ചതിനോട് ഐക്യദാര്‍ഢ്യവുമായി ഡി.സി.സി പ്രസിഡണ്ട് ടി.സിദ്ദീഖ് എത്തിയത് കുട്ടികള്‍ക്ക് ആവേശമായി.
പ്രകൃതിയുടെ നിലനില്‍പിനും പരിസ്ഥിതിസംരക്ഷണത്തിനുമായി കോഴിക്കോട് ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ നടത്തുന്ന വിവിധ പരിപാടികളുടെ ഭാഗമായി 'ജലഹസ്തം' എന്ന പേരില്‍ മുക്കംകടവ് പാലത്തിന് സമീപം ഇരുവഴിഞ്ഞിപ്പുഴയോരത്ത് നാളെ (വ്യാഴാഴ്ച )രാവിലെ ഒന്‍പതിന് പ്രതിപക്ഷ നേതാവ് രമേഷ് ചെന്നിത്തല ഉദ്ഘാടനം ചെയ്യുന്ന പരിപാടിയുടെ തയ്യാറെടുപ്പിനായി മുക്കത്തെത്തിയതായിരുന്നു ഡി.സി.സി പ്രസിഡണ്ട് ടി.സിദ്ദീഖ്.
ഇതിനിടയിലാണ് പിഞ്ചുകുട്ടികള്‍ മണിക്കൂറുകളെടുത്ത് ഇരുവഴിഞ്ഞിപുഴ വൃത്തിയാക്കുന്ന വിവരം അറിയുന്നത്. ഉടനെ അവിടെ എത്തിയ അദ്ദേഹം കുട്ടികള്‍ക്ക് ഐക്യദാര്‍ഢ്യം പ്രഖ്യാപിക്കുകയായിരുന്നു.
എസ്.കെ.എസ്.എസ്.എഫിന്റെ നേതൃത്വത്തില്‍ പിഞ്ചുകുട്ടികള്‍ നടത്തിയ ഈ ശുചീകരണ പ്രവര്‍ത്തനങ്ങള്‍ അഭിനന്ദനാര്‍ഹമാണന്ന് ടി.സിദ്ദീഖ് പറഞ്ഞു.
ബാബു പൈക്കാട്ട്, സി.ജെ.ആന്റണി, എം.ടി.അഷ്‌റഫ്, ശംസുദ്ദീന്‍ ചേന്ദമംഗല്ലൂര്‍, അപ്പുക്കുട്ടന്‍ മാസ്റ്റര്‍ എന്നിവരും അദ്ദേഹത്തോടൊപ്പമുണ്ടായിരുന്നു.
നേരത്തെ ശുചീകരണ യജ്ഞത്തിന്റെ ഉദ്ഘാടനം കോഴിക്കോട് ജില്ലാ എസ്.കെ.എസ്.എസ്.എഫ് സെക്രട്ടറി അലി അക്ബര്‍ മുക്കം നിര്‍വഹിച്ചു.എസ്.കെ.എസ്.ബി.വി ജില്ലാ സെക്രട്ടറി നൗഫല്‍ ചോലക്കല്‍ അധ്യക്ഷനായി.
യൂനുസ് പുത്തലത്ത്, അബ്ദുല്‍ ബര്‍ മാസ്റ്റര്‍, അംജദ് ഖാന്‍ റശീദി, ഫായിസ് ദാരിമി,നുഹുമാന്‍ കുമാരനെല്ലൂര്‍, ആഷിഖ് അലി ഇബ്രാഹിം എന്നിവര്‍ സംസാരിച്ചു. ലുഖ്മാന്‍ എളേത്തെ്, മുനവ്വിര്‍ മുക്കം, ഫള്‌ലുറഹ്മാന്‍, മുസദ്ദിഖ് കെ.ടി, ഫവാസ് കെ.പി, അസദുല്‍ ഇസ്ലാം, സഹീര്‍ ഖാന്‍ എം.പി കെ, ദില്‍ഷാദ് സലീം സി. എന്നിവര്‍ ശുചീകരണത്തിന് നേത്യത്വം നല്‍കി.