കല്‍പ്പറ്റ: കൊച്ചിയിലെ പീസ് സ്‌കൂള്‍ പൂട്ടാനുള്ള യഥാര്‍ഥ കാരണമെന്തെന്ന് സര്‍ക്കാര്‍ വ്യക്തമാക്കണമെന്ന് മുസ്‌ലിം ലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ് ആവശ്യപ്പെട്ടു. സി.ബി.എസ്.ഇ സിലബസിലാണ് സ്‌കൂള്‍ പ്രവര്‍ത്തിക്കുന്നത്. ഇവിടെ മോറല്‍ ക്ലാസുകള്‍ നടക്കുന്നുണ്ട്.
മോറല്‍ ക്ലാസുകള്‍ എല്ലാ മാനേജ്‌മെന്റുകളുടെയും സ്‌കൂളുകളില്‍ നടക്കുന്നുണ്ട്. ആര്‍.എസ്.എസ് നേതാവ് മോഹന്‍ ഭാഗവത് പാലക്കാട്ടെ ഒരു സ്‌കൂളില്‍ ദേശീയ പതാക ഉയര്‍ത്തിയതില്‍ നടപടിയെടുക്കാതെ അതിനെതിരേ ശക്തമായി നിലകൊണ്ട ജില്ലാ കലക്ടറെ സ്ഥലം മാറ്റിയും സ്‌കൂള്‍ പ്രധാനാധ്യാപകനെതിരേ നടപടിയെടുത്തും തങ്ങളുടെ കാവി മുഖം ഒന്നുകൂടി വ്യക്തമാക്കുകയാണ് സര്‍ക്കാര്‍ ചെയ്തത്.
ചില സ്‌കൂളുകള്‍ക്കെതിരേ മാത്രം അടച്ചുപൂട്ടല്‍ നടപടി കൈകൊള്ളുമ്പോള്‍ ആ സ്‌കൂളിലെ വിദ്യാര്‍ഥികളുടെ ഭാവികൂടി ഓര്‍ക്കേണ്ടതുണ്ടെന്നും ഇത്തരത്തിലുള്ള നടപടികളില്‍ നിന്ന് സര്‍ക്കാര്‍ പിന്തിരിയണമെന്നും കെ.പി.എ മജീദ് ആവശ്യപ്പെട്ടു.