അരിമുള: കേരള സര്‍ക്കാര്‍ സാമൂഹ്യ വന വല്‍ക്കരണ വിഭാഗം നല്‍കുന്ന 2500 രൂപയുടെ ക്യാഷ് അവാര്‍ഡ് അടങ്ങുന്ന വനമിത്ര പുരസ്‌കാരത്തിന് അരിമുള സ്‌കൂളിന്. വര്‍ഷങ്ങളായി വിദ്യാലയം നടത്തി വരുന്ന പരിസ്ഥിതി സൗഹൃദ പ്രവര്‍ത്തനങ്ങളാണ് വിദ്യാലയത്തെ അവാര്‍ഡിന് അര്‍ഹമാക്കിയത്. വിദ്യാലയത്തില്‍ പ്രവര്‍ത്തിക്കുന്ന എവര്‍ഗ്രീന്‍ പരിസ്ഥിതി ക്ലബിന്റെ നേതൃത്വത്തില്‍ ജൈവ പച്ചക്കറി കൃഷി പുഴയോരം തണലോരം എന്ന പരിപാടിയിലൂടെ നദി, തോട് തടങ്ങളില്‍ മുള, ഈറ്റ എന്നിവ വച്ച് പിടിപ്പിക്കല്‍, ഫല വൃക്ഷങ്ങള്‍ കാടിനുള്ളില്‍ നട്ട് പരിപാലിക്കല്‍ തോടുകളില്‍ തടയണ നിര്‍മാണം, ജൈവ നെല്‍കൃഷി, തുടങ്ങിയ നിരവധി പദ്ധതികളാണ് വിദ്യാലയം നടത്തിവരുന്നത്. വനമിത്ര അവാര്‍ഡ് പുരസ്‌കാരത്തിന് വിദ്യാലയത്തെ അര്‍ഹമാക്കിയ എവര്‍ഗ്രീന്‍ പരിസ്ഥിതി ക്ലബ് അംഗങ്ങളെയും കോഡിനേറ്റര്‍ എം സതീദേവി ടീച്ചറെയും പി.ടി.എ യോഗം അനുമോദിച്ചു. എസ് സുനില്‍ കുമാര്‍, കെ.എന്‍ സരള, എന്‍.ആര്‍ സോമന്‍ മാസ്റ്റര്‍, മനോഹരി, സുരേഷ് സംസാരിച്ചു.