കോഴിക്കോട്: ബ്രൗണ്‍ഷുഗര്‍, മദ്യക്കടത്ത് കേസില്‍ പ്രതിയായ പിടികിട്ടാപ്പുള്ളി പൊലിസ് പിടിയിലായി. കോഴിക്കോട് പുതിയപാലം ചുള്ളിയില്‍ വീട്ടില്‍ ഇമ്പിച്ചമ്മു മകന്‍ പി.കെ മുബാസാണ് (28) പിടിയിലായത്. കോഴിക്കോട് എക്‌സൈസ് എന്‍ഫോഴ്‌സ്‌മെന്‍ ആന്‍ഡ് ആന്‍ഡി നാര്‍ക്കോട്ടിക് സ്‌പെഷല്‍ സ്‌ക്വാഡിലെ എക്‌സൈസ് ഇന്‍സ്‌പെക്ടര്‍ പി. മുരളീധരന്റെ നേതൃത്വത്തിലായിരുന്നു അറസ്റ്റ്.
2015 ഒക്‌ടോബറില്‍ 1.370 കിലോഗ്രാം ബ്രൗണ്‍ഷുഗര്‍ പിടികൂടിയ കേസിലെ രണ്ടാം പ്രതിയായ മുബാസ് കഴിഞ്ഞ ഒരു വര്‍ഷത്തിലധികമായി ഒളിവില്‍ കഴിയുകയായിരുന്നു. ഇയാള്‍ പ്രതിയായ അബ്കാരി കേസില്‍ ഹാജരാകുന്നതിനായി ജില്ലാ കോടതി പരിസരത്ത് എത്താനിടയുണ്ടെന്നുള്ള രഹസ്യ വിവരത്തിന്റെ അടിസ്ഥാനത്തില്‍ കോടതി പരിസരം രാവിലെ മുതല്‍ എക്‌സൈസ് നിരീക്ഷണത്തിലായിരുന്നു. എക്‌സൈസിന്റെ സാന്നിധ്യം മനസിലാക്കി സ്ഥലം വിടാന്‍ ശ്രമിച്ച പ്രതിയെ തന്ത്രപൂര്‍വം പിടികൂടുകയായിരുന്നു. ഇയാള്‍ ഉള്‍പ്പെട്ട ബ്രൗണ്‍ഷുഗര്‍ കേസിലെ ഒന്നാം പ്രതിക്ക് ഒരാഴ്ച മുന്‍പാണ് കോടതി 10 വര്‍ഷം കഠിനതടവും ഒന്നര ലക്ഷം രൂപ പിഴയും ശിക്ഷ വിധിച്ചത്. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.