പൂച്ചാക്കല്‍: മാക്കേക്കടവ്- നേരേകടവ് പാലം നിര്‍മാണ ശിലാസ്ഥാപന ചടങ്ങില്‍ നിന്നു തന്നെ ഒഴിവാക്കിയത് വേദനാജനകമാണെന്ന് കെ.സി വേണുഗോപാല്‍ എം.പി പറഞ്ഞു.
തുറവൂര്‍ - പമ്പ പദ്ധതിക്ക് 149 കോടി രൂപ അനുവദിച്ചതും പദ്ധതിക്ക് ഭരണാനുമതി നേടിയതും ടെന്‍ഡര്‍ വിളിച്ച് നിര്‍മാണ പ്രവര്‍ത്തനങ്ങള്‍ ആരംഭിച്ചതും യു.ഡി.എഫ് സര്‍ക്കാരിന്റെ കാലത്താണ്.
തുറവുര്‍ പാലത്തിന്റെ നിര്‍മാണവും പൂര്‍ത്തീകരണ ഉദ്ഘാടനവും വിപുലമായ സ്വാഗത സംഘം വിളിച്ചു ജനപ്രതിനിധികളെയും നാട്ടുകാരുടെയും പങ്കാളിത്തത്തോടെയായിരുന്നു നടത്തിയത്. എന്നാല്‍ മാക്കേക്കടവ്- നേരേകടവില്‍ പാലം നിര്‍മാണം തുടങ്ങി അഞ്ച് മാസത്തിനു ശേഷമാണ് ശിലാസ്ഥാപനം നടത്തുന്നത്. ഒന്നര മാസം മുമ്പ് താന്‍ നേരിട്ടെത്തി നിര്‍മ്മാണ പ്രവര്‍ത്തനം വിലയിരുത്തിയതാണ്.
എല്ലാം ശ്രദ്ധിക്കുന്ന മന്ത്രി ജി.സുധാകരന്‍ ഇക്കാര്യം ശ്രദ്ധിക്കാതിരുന്നത് ഖേദകരമാണ്. ശിലാസ്ഥാപനം രാഷ്ട്രീയ പരിപാടിയാക്കി മാറ്റി. ജനപ്രതിനിധികളോട് കാട്ടുന്ന മര്യാദ കാണിച്ചില്ല. പൂച്ചാക്കലില്‍ മാധ്യമ പ്രവര്‍ത്തകരുമായി സംസാരിക്കുകയായിരുന്നു എം.പി. ഡി.സി.സി വൈസ് പ്രസിഡന്റ് ടി.ജി രഘുനാഥപിള്ള, യൂത്ത് കോണ്‍ഗ്രസ് അരുര്‍ നിയോജക മണ്ഡലം പ്രസിഡന്റ് എസ് രാജേഷ്, മണ്ഡലം പ്രസിഡന്റ് സിബി ജോണ്‍, എ.കെ സദാനന്ദന്‍ എന്നിവര്‍ എം.പി യോടൊപ്പം ഉണ്ടായിരുന്നു. എം.പിയെ ഒഴിവാക്കിയതില്‍ പ്രതിഷേധിച്ച് മാക്കേക്കടവില്‍ കോണ്‍ഗ്രസ് പ്രവര്‍ത്തകര്‍ പ്രതിഷേധ പ്രകടനം നടത്തി.