പ്രാചീന കാലം മുതലേ സൗന്ദര്യ വര്‍ദ്ധക വസ്തുവായി ഉപയോഗിക്കുന്ന ഒന്നാണ് വിവിധ തരം എണ്ണകള്‍. ആയുര്‍വേദത്തില്‍ വിവിധ എണ്ണകള്‍ക്ക് വലിയ പ്രാധാന്യമാണുള്ളത്. ആയുര്‍വേദ തെറാപ്പി,മസാജിങ്ങ് എന്നിവക്കും ശരീര സൗന്ദര്യ വര്‍ദ്ധവിനുമായുള്ള വിവിധ തരം എണ്ണകള്‍ പരിചയപ്പെടാം.

വെളിച്ചെണ്ണ: മുടികൊഴിച്ചിലിനും മുടിയുടെ ബലവും ദൃഢതയും ഉറപ്പാക്കാനുമായാണ് വെളിച്ചെണ്ണ പ്രധാനമായും ഉപയോഗിക്കുന്നത്. എണ്ണ ചൂടാക്കിയുള്ള തെറാപ്പിയും ഇതിന് മികച്ച ഗുണം ചെയ്യും.

എള്ളെണ്ണ: ബോഡി മസാജിങ്ങിനായി പൊതുവെ ഉപയോഗിക്കുന്ന എണ്ണയാണ് എള്ളെണ്ണ. ശരീരത്തില്‍ പരിമളം പരത്തുവാനും ശരീരവും ചര്‍മവും മൃദുവാക്കാനുമെല്ലാം എള്ളെണ്ണ ഏറെ ഉപകാരപ്രദമാണ്.

ഒലീവ് എണ്ണ: മുടിക്കും ചര്‍മത്തിനും ഒരുപോലെ ഉപകാരപ്രദമായ എണ്ണയാണ് ഒലീവ് ഓയില്‍. നിരവധി വിറ്റാമിനുകളും പോഷകവുമടങ്ങിയിട്ടുണ്ട് ഇതില്‍. ചെറിയ കുട്ടികളുടെ മൃദുവായ ചര്‍മത്തിനും വരണ്ട ചര്‍മത്തിനും മുടികൊഴിച്ചിലിനുമെല്ലാം ഇത് ഫലപ്രദമാണ്.

ബദാം ഓയില്‍: ഉഴിച്ചിലിനും തടവലിനും ഉപയോഗിക്കുന്ന പ്രധാനപ്പെട്ട എണ്ണയാണ് ബദാം ഓയില്‍. ശരീരത്തിലെ ചൊറിച്ചിലിനും മറ്റു വ്രണങ്ങള്‍ മാറാനുമെല്ലാം ഇത് ഉപകരിക്കും. മൃദുലമായ ചര്‍മം ആഗ്രഹിക്കുന്നവര്‍ക്കും ബദാം ഓയില്‍ പരീക്ഷിക്കാവുന്നതാണ്.

ആവണക്കെണ്ണ: മുടികൊഴിച്ചിലിനും മുടി പൊട്ടിപ്പോകുന്നതിനുമെല്ലാം വളരെ ഉപകാരപ്രദമാകുന്ന ഒന്നാണ് ആവണക്കെണ്ണ. മുടിയുടെ കറുപ്പ് നിറം നിലനിര്‍ത്തുന്നതിനും നര ഒഴിവാക്കാനും ഇത് ഉപകരിക്കും. കണ്‍പീലി വളര്‍ത്താനും നെറ്റിയിലെ പുരികയുടെ കട്ടി വര്‍ദ്ധിപ്പിക്കാനും ഇത് ഉത്തമമാണ്.