ജിദ്ദ; പതിനൊന്നു വര്‍ഷത്തിനിടെ ഇതാദ്യമായി വിദേശികള്‍ നാട്ടിലേക്ക് അയക്കുന്ന പണത്തില്‍ കുറവ്. കഴിഞ്ഞ വര്‍ഷം സഊദിയിലെ വിദേശികള്‍ സ്വദേശങ്ങളിലേക്ക് അയച്ചത് 151.9 ബില്യണ്‍ റിയാലാണ്.

2015 ല്‍ ഇത് 156.9 ബില്യണ്‍ റിയാലായിരുന്നു. 2016 ല്‍ വിദേശികള്‍ അയച്ചത് ഏകദേശം 500 കോടിയോളം റിയാലിന്റെ (മൂന്ന് ശതമാനം) കുറവാണ് രേഖപ്പെടുത്തിയത്.

2005 മുതല്‍ 2015 അവസാനം വരെയുള്ള കാലത്ത് എല്ലാ വര്‍ഷവും വിദേശികളുടെ റെമിറ്റന്‍സ് വര്‍ധിച്ചുവരികയായിരുന്നു. 2016 ല്‍ സഊദിയിലെ വിദേശികള്‍ ശരാശരി 13,000 റിയാല്‍ (പ്രതിമാസം 1,084 റിയാല്‍) സ്വദേശങ്ങളിലേക്ക് അയച്ചതായാണ് കണക്ക്.


2015 ല്‍ വിദേശികള്‍ ശരാശരി 15,600 റിയാല്‍ (പ്രതിമാസം 1,298 റിയാല്‍) സ്വദേശങ്ങളിലേക്ക് അയച്ചിരുന്നു. 2015 ല്‍ വിദേശികളുടെ റെമിറ്റന്‍സ് സഊദിയുടെ ചരിത്രത്തിലെ സര്‍വകാല റെക്കോര്‍ഡ് ആയിരുന്നു. കഴിഞ്ഞ വര്‍ഷം വ്യക്തിപരമായ ആവശ്യങ്ങള്‍ക്ക് സഊദികള്‍ വിദേശത്തേക്ക് അയച്ച പണത്തിലും കുറവ് രേഖപ്പെടുത്തി.

2016 ല്‍ സൗദികള്‍ 59.6 ബില്യണ്‍ റിയാലാണ് വിദേശങ്ങളിലേക്ക് അയച്ചത്. 2015 ല്‍ ഇത് 89.2 ബില്യണ്‍ റിയാലായിരുന്നു.