മേപ്പാടി: വാഹന പരിശോധന നടത്തുകയായിരുന്ന മേപ്പാടി എസ്.ഐ രാധാകൃഷ്ണനെ ആക്രമിച്ച നാലംഗ സംഘം അറസ്റ്റില്‍. നെടുംബാല നത്തംകുനി സ്വദേശികളായ വിജയകുമാര്‍, അനീഷ്, അജിത്ത്, സ്റ്റാര്‍ലിംഗ് എന്നിവരെയാണ് പൊലീസ് അറസ്റ്റ് ചെയ്തത്.
ഞായറാഴ്ച്ച രാത്രിയില്‍ നെടുംബാല നത്തംകുനി റോഡില്‍ എസ്.ഐയുടെ നേതൃത്വത്തില്‍ വാഹന പരിശോധന നടത്തി വരികയായിരുന്നു. ഈ സമയം ബൈക്കുമായി സ്ഥലത്തെത്തിയ വിജയകുമാര്‍ വാഹനം പരിശോധിക്കാന്‍ അനുവദിച്ചില്ല. കഞ്ചാവ് വില്‍പ്പനക്കാരനാണ് വിജയകുമാറെന്ന് പൊലിസ് പറഞ്ഞു.
പൊലിസുമായി ഇയാള്‍ തട്ടികയറി. ഇതിനിടയില്‍ ഇയാളുടെ സംഘത്തില്‍പെട്ട അനീഷ്, അജിത്ത്, സ്റ്റാര്‍ലിംഗ് എന്നിവര്‍ കൂടി സ്ഥലത്തെത്തി. തുടര്‍ന്ന് സംഘം എസ്.ഐ യുമായി തട്ടികയറി. ഇതിനിടയില്‍ എസ്.കെ രാധാകൃഷ്്ണനെ സംഘം മര്‍ദിക്കുകയായിരുന്നുവെന്ന് പൊലിസ് പറഞ്ഞു.
കല്‍പ്പറ്റ സി.ഐയുടെ നേതൃത്വത്തില്‍ കൂടുതല്‍ പൊലിസുകാര്‍ സ്ഥലതെത്തിയാണ് ഇവരെ പിടികൂടിയത്. പൊലിസുകാരെ അക്രമിക്കല്‍, കൃത്യനിര്‍വഹണം തടസ്സപെടുത്തല്‍ തുടങ്ങിയ കുറ്റങ്ങള്‍ ചുമത്തി കേസെടുത്ത പ്രതികളെ കോടതി റിമാന്റ് ചെയ്തു.