ന്യൂഡല്‍ഹി:പ്രായപൂര്‍ത്തിയായ സ്ത്രീകള്‍ക്ക് സ്വയം തീരുമാനമെടുക്കാന്‍ അധികാരമുണ്ടെന്ന് സുപ്രിം കോടതി. അതേസമയം കോടതികള്‍ക്ക് അവരുടെ സൂപ്പര്‍ രക്ഷാകര്‍ത്താവാകാന്‍ സാധിക്കില്ലെന്നും കോടതി വ്യക്തമാക്കി. ചീഫ് ജസ്റ്റിസ് ദീപക് മിശ്ര അധ്യക്ഷനായ ബെഞ്ചിന്റേതാണ് ഈ നിരീക്ഷണം.
പ്രായപൂര്‍ത്തിയായ മകളുടെ സംരക്ഷണാവകാശം ആവശ്യപ്പെട്ട് മാതാവ് സമര്‍പ്പിച്ച ഹരജി പരിഗണിക്കവേയാണ് ബെഞ്ചിന്റെ നിരീക്ഷണം. മകളുടെ സംരക്ഷണാവകാശം ആവശ്യപ്പെട്ട് മാതാവ് നല്‍കിയ കുടുംബകോടതിയുടെ ഉത്തരവും ഹരജിക്കൊപ്പം സമര്‍പ്പിച്ചിരുന്നു. എന്നാല്‍ സംരക്ഷണാവകാശവുമായി ബന്ധപ്പെട്ട ഏതെങ്കിലും ഉത്തരവ് പുറപ്പെടുവിക്കാന്‍ കോടതി തയാറായില്ല.
പ്രായപൂര്‍ത്തിയായ സ്ത്രീകള്‍ക്ക് ജീവിതത്തില്‍ തീരുമാനങ്ങളെടുക്കാന്‍ നിരുപാധികമായ അവകാശമുണ്ട്. അക്കാര്യത്തില്‍ അവര്‍ക്ക് വിലക്കുണ്ടാകാന്‍ പാടില്ല. പ്രായപൂര്‍ത്തിയായെന്ന നിലയില്‍ സ്ത്രീക്ക് പൂര്‍ണ സ്വാതന്ത്ര്യമുണ്ടെന്നും അത് ആസ്വദിക്കാനും അവകാശമുണ്ട്. ഇഷ്ടപ്പെടുന്ന സ്ഥലങ്ങളില്‍ പോകാനും ഇഷ്ടമുള്ള കാര്യങ്ങള്‍ ചെയ്യാനും സ്ത്രീകള്‍ക്ക് സാധിക്കും. ലക്ഷ്യങ്ങള്‍ നേടുന്ന കാര്യത്തില്‍ അവരെ തടയാനാകില്ലെന്നും കോടതി അഭിപ്രായപ്പെട്ടു.
ഹരജിക്കാരിയുടെ മകള്‍ക്ക് കഴിഞ്ഞ സെപ്റ്റംബറില്‍ പ്രായപൂര്‍ത്തിയായിരുന്നു. തുടര്‍ന്ന് കുവൈത്തിലേക്ക് പോകാനും പിതാവിനൊപ്പം താമസിക്കാനും പെണ്‍കുട്ടി തീരുമാനിച്ചു. തുടര്‍ന്നാണ് മാതാവ് സുപ്രിം കോടതിയെ സമീപിച്ചത്.
പെണ്‍കുട്ടിക്ക് പ്രായപൂര്‍ത്തിയായതിനാല്‍ ആര്‍ക്കൊപ്പം ജീവിക്കണമെന്ന് തീരുമാനമെടുക്കാന്‍ അവള്‍ക്ക് അവകാശവും സ്വാതന്ത്ര്യവും ഉണ്ടെന്നും കോടതി പറഞ്ഞു.