കോതമംഗലം: എട്ടും പതിനാലും വയസുള്ള ദലിത് ബാലികമാരെ പീഡിപ്പിച്ച അച്ഛന്‍ അറസ്റ്റില്‍. മാമലക്കണ്ടം പുല്ലശ്ശേരി സാബു(35)വിനെയാണ് പൊലിസ് അറസ്റ്റ് ചെയ്തത്. എളബ്ലാശേരിയില്‍ താമസിക്കുന്ന തെങ്ങുകയറ്റ തൊഴിലാളിയായ സാബു മൂന്ന് വര്‍ഷമായി സ്വന്തം മക്കളെ പീഡിപ്പിച്ച് വരികയായിരുന്നുവെന്ന് പൊലിസ് പറഞ്ഞു. പീഡനം സഹിക്കാതായതിനെത്തുടര്‍ന്ന് മൂത്ത മകള്‍ നല്‍കിയ പരാതിയെ തുടര്‍ന്നാണ് പൊലിസ് ഇയാളെ അറസ്റ്റ് ചെയ്തത്. അമ്മ കുട്ടികളെ അനാഥാലയത്തില്‍ ആക്കിയിരുന്നുവെങ്കിലും ഇവിടെ നിന്നും അവധി ദിവസങ്ങളില്‍ വീട്ടിലെത്തുമ്പോഴും പീഡനം തുടര്‍ന്നു. ഇതെത്തുടര്‍ന്ന് കുട്ടികള്‍ അനാഥാലയത്തില്‍ നിന്നും അവധിക്ക് വീട്ടില്‍ പോകാതായി. സംശയം തോന്നിയ അനാഥാലയ അധികൃതരുടെ അന്വേഷണത്തിലാണ് കുട്ടികള്‍ കാര്യങ്ങള്‍ വെളിപ്പെടുത്തിയത്. സി.ഐ വി.ടി ഷാജന്റെ നേതൃത്വത്തില്‍ കുട്ടമ്പുഴ എസ്.ഐ ആര്‍ രാജേഷും സംഘവുമാണ് സാബുവിനെ അറസ്റ്റ് ചെയ്തത്. പ്രതിയെ റിമാന്‍ഡ് ചെയ്തു.