കായംകുളം: വാഹന പരിശോധനക്കിടെ ബൈക്കില്‍ കഞ്ചാവുമായി എത്തിയ യുവാവിനെ എക്‌സൈസ് അറസ്റ്റ് ചെയ്തു. രാമപുരം കൊച്ചുകുമ്പളത്ത് വീട്ടില്‍ മഹേഷ് (18) ആണ് പിടിയിലായത്.
മുതുകുളം കേന്ദ്രീകരിച്ച് ബൈക്കില്‍ യുവാവ് കഞ്ചാവ് വില്‍പ്പന നടത്തുന്നതായി എക്‌സൈസിനു രഹസ്യ വിവരം ലഭിച്ചിരുന്നു. ഇതേതുടര്‍ന്ന് ഇന്നലെ രാവിലെ എക്‌സൈസ് റേഞ്ച് ഇന്‍സ്‌പെക്ടര്‍ ബി അന്‍ഷാദിന്റെ നേതൃത്വത്തില്‍ മുതുകുളത്ത് വാഹന പരിശോധന നടത്തുന്നതിനിടെയാണ് ഇയാള്‍ പിടിയിലായത്. ആഡംബര ബൈക്കിലെത്തിയ ഇയാളുടെ പക്കല്‍ നിന്നും 15 ഗ്രാം കഞ്ചാവ് കണ്ടെത്തി.
ഇയാളെ ചോദ്യം ചെയ്തതില്‍ നിന്ന് അന്യസംസ്ഥാന തൊഴിലാളികളാണ് ഇയാള്‍ക്ക് കഞ്ചാവ് എത്തിച്ചുകൊടുക്കുന്നതെന്നും ഒരു പൊതിക്ക് 500 രൂപാവരെ വിലക്കാണു വില്‍ക്കുന്നതെന്നും വില്‍പ്പന നടത്തി ലഭിക്കുന്ന പണം ആഡംബര ജീവിതത്തിനായി ചിലവാക്കുകയാണ് ചെയ്യുന്നതെന്ന് ഇയാള്‍ സമ്മതിച്ചതായും എക്‌സൈസ് ഉദ്യോഗസ്ഥന്‍ പറഞ്ഞു.