തിരൂരങ്ങാടി: വീട്ടിലേക്കുള്ള യാത്രാമധ്യേ ഒന്‍പതാം ക്ലാസ് വിദ്യാര്‍ഥിയെ അഞ്ചംഗസംഘം  മര്‍ദിച്ച് ലായനി കുടിപ്പിച്ചതായി പരാതി. പരപ്പനങ്ങാടിയിലെ പ്രമുഖ  സ്‌കൂളിലെ വിദ്യാര്‍ഥിയെയാണ് സ്‌കൂള്‍ വിട്ട് വീട്ടിലേക്ക് മടങ്ങുമ്പോള്‍   പരപ്പനങ്ങാടി ബീച്ച് റോഡിലെ മില്ല്‌വളവില്‍ വച്ച് സംഘം പിടികൂടിയത്.
പൊക്കിയെടുത്ത് സമീപത്തെ ആളെഴിഞ്ഞ വീട്ടില്‍ കൊണ്ടുപോയി കൈകാലുകള്‍ക്ക് അടിക്കുകയും കണ്ണ് പൊത്തി ലായനി വായില്‍  ഒഴിച്ച് കുടിപ്പിക്കാന്‍ ശ്രമിച്ചതായും  പരാതിയില്‍ പറയുന്നു.  അബോധാവസ്ഥയിലായ കുട്ടിയെ സമീപത്തെ വീടിനിന്റെ മതിലിനടുത്ത് ഉപേക്ഷിച്ച സംഘം സ്ഥലംവിടുകയായിരുന്നു. അബോധാവസ്ഥയില്‍ കുട്ടിയെ കണ്ട പരിസരവാസികള്‍, വിവരമറിയിച്ചതിനെ തുടര്‍ന്ന് ബന്ധുക്കളെത്തി തിരൂരങ്ങാടി താലൂക്കാശുപത്രിയില്‍ പ്രവേശിപ്പിച്ചു.  ചൈല്‍ഡ്‌ലൈന്‍ കൗണ്‍സിലര്‍മാര്‍, പരപ്പനങ്ങാടി പൊലിസ് എന്നിവരെത്തി കുട്ടിയുടെ മൊഴിയെടുത്തു.