കുന്ദമംഗലം: പെരിങ്ങൊളം റോഡ് ജങ്ഷനില്‍ അപകടം തുടര്‍ക്കഥയാകുന്നു. ഇന്നലെ ഉച്ചയ്ക്ക് മൂന്നരയോടെ ടിപ്പര്‍ ലോറിയും ബൈക്കും കൂട്ടിയിടിച്ച് ബൈക്ക് യാത്രക്കാരന് പരുക്കേറ്റു. കോട്ടാംപറമ്പ് സ്വദേശി ചാലില്‍ ഫൈസലി (39) നാണ് പരുക്കേറ്റത്. ഇയാളെ മെഡിക്കല്‍ കോളജ് ആശുപത്രിയില്‍ പ്രവേശിച്ചു. കുന്ദമംഗലം ടൗണില്‍നിന്നു ഒരേ ദിശയില്‍ വന്ന ഇരുവാഹനങ്ങളും പെരിങ്ങൊളം റോഡിലേക്കു തിരിയവെ ബൈക്കില്‍ ടിപ്പര്‍ലോറിയിടിച്ച് ബൈക്കും യാത്രക്കാരനായ ഫൈസലും ലോറിക്കടിയിലേക്കു വീഴുകയായിരുന്നു. സമീപത്തെ സ്വകാര്യ സ്‌കൂള്‍, മില്‍മ, പെരിങ്ങൊളം ഹയര്‍ സെക്കന്‍ഡറി സ്‌കൂള്‍ എന്നിവിടങ്ങളിലേക്കുള്ള ഈ റോഡിന്റെ വീതിക്കുറവു കാരണം നിരവധി അപകടങ്ങളാണ് മേഖലയില്‍ ഉണ്ടാകുന്നത്.