മലപ്പുറം: സി.പി.എം മലപ്പുറം ജില്ലാ സെക്രട്ടറിയായി ഇ.എന്‍ മോഹന്‍ദാസിനെ തെരഞ്ഞെടുത്തു. സി.പി.ഐ എം ബ്രാഞ്ച് സെക്രട്ടറിയായി തുടങ്ങി ലോക്കല്‍, ഏരിയാസെക്രട്ടറിയുമായി പാര്‍ടിയുടെ വിവിധ തലങ്ങളില്‍ പ്രവര്‍ത്തിച്ചാണ് ഏകകണ്ഠമായി മലപ്പുറത്തെ പാര്‍ട്ടിയുടെ നേതൃത്വത്തിലെത്തുന്നത്. 22വര്‍ഷമായി ജില്ലാസെക്രട്ടറിയറ്റംഗമാണ്.

കോട്ടക്കലിനടുത്ത് ഇന്ത്യനൂര്‍ സ്വദേശിയായ ഈ 66 കാരന്‍ എസ്.എഫ്.ഐ ജില്ലാ ജോ. സെക്രട്ടറിയും ഏറനാട് താലൂക്ക് സെക്രട്ടറിയുമായിരുന്നു. യുവജനപ്രസ്ഥാനമായ കെ.എസ്.വൈ.എഫിന്റെ ജില്ലാപ്രസിഡന്റും ഡി.വൈ.എഫ്.ഐയുടെ പ്രഥമ മലപ്പുറം ജില്ലാപ്രസിഡന്റുമായി. 1970ലാണ് പാര്‍ടി മെമ്പറായത്. സി.പി.എം ഇന്ത്യനൂര്‍ ബ്രാഞ്ച് സെക്രട്ടറി, കോട്ടക്കല്‍ ലോക്കല്‍ സെക്രട്ടറി, പതിനൊന്ന് വര്‍ഷം മലപ്പുറം ഏരിയാസെക്രട്ടറിയുമായ പ്രവര്‍ത്തിച്ചിട്ടുണ്ട്. നീണ്ടകാലം കോട്ടക്കല്‍ ആര്യവൈദ്യശാല ജീവനക്കാരുടെ സംഘടനയായ ആര്യവൈദ്യശാല ഫെഡറേഷന്‍(സി.ഐ.ടി.യു) പ്രസിഡന്റായിരുന്നു. കെ.എസ.്‌കെ.ടി.യു, സി.ഐ.ടി.യു സംഘടനകളുടെ ജില്ലാകമ്മിറ്റി അംഗവുമായിട്ടുണ്ട്.