ആലപ്പുഴ: ആലപ്പുഴ മെഡിക്കല്‍ കോളേജിലെ കോളേജ് ഓഫ് ഫാര്‍മസ്യൂട്ടിക്കല്‍ സയന്‍സില്‍ നാല് അസിസ്റ്റന്റ് പ്രൊഫസര്‍മാരുടെ തസ്തിക സൃഷ്ടിച്ച് നിയമനം നടത്താന്‍ സര്‍ക്കാര്‍ ഉത്തരവായി. മെഡിക്കല്‍ കോളേജിലെ ബാച്ചിലര്‍ ഓഫ് ഫാര്‍മസി കോഴ്‌സിന്റെ അംഗീകാരം നിലനിര്‍ത്തുന്നതിനുവേണ്ടിയാണ് സര്‍ക്കാര്‍ സീനിയര്‍ ലക്ചറര്‍ തസ്തിക സൃഷ്ടിക്കാന്‍ തീരുമാനിച്ചത്.
സ്ഥലം എം.എല്‍.എ കൂടിയായ പൊതുമരാമത്ത് - രജിസ്‌ട്രേഷന്‍ മന്ത്രി ജി. സുധാകരന്റെ ആവശ്യ പ്രകാരമാണ് ആരോഗ്യമന്ത്രി കഴിഞ്ഞ മന്ത്രിസഭാ യോഗത്തില്‍ ഇക്കാര്യം പരിഗണിച്ചത്. ഇതോടെ ബിഫാം വിദ്യാര്‍ത്ഥികള്‍ക്കും രക്ഷാകര്‍ത്താക്കള്‍ക്കും ഉണ്ടായിരുന്ന ആശങ്ക പരിഹരിച്ചതായി മന്ത്രി അറിയിച്ചു.