കരുളായി: മാഞ്ചീരി ചോലനായ്ക്ക കോളനിയില്‍ കാട്ടാനകളുടെ വിളയാട്ടം. കഴിഞ്ഞ ദിവസം കോളനിയില്‍ കടന്ന ആന താളിപ്പുഴ ചാത്തിയുടെ വീടിന്റെ അടുക്കളയുടെ ഷെഡും, വനം വകുപ്പിന്റെ സ്‌റ്റോറിന്റെ ജനല്‍ചില്ലും തകര്‍ത്തു. കോളനിയിലെ ആനശല്യം തടയുന്നതിനായി കോളനിക്കുചുറ്റും കിടങ്ങ് കീറിയിട്ടുണ്ട്. കിടങ്ങില്ലാത്ത പുഴയുടെ ഭാഗത്തുകൂടിയാണ് ആന കോളനിയില്‍ കടന്ന് നാശനഷ്ടം വരുത്തിയത്.
കിടങ്ങ് ചാടിക്കടന്നും ആന കോളനിക്കകത്തു കയറാറുണ്ടെന്ന് വീട്ടുകാര്‍ പറഞ്ഞു. വനശല്യം രൂക്ഷമായതിനെ തുടര്‍ന്ന് ഇവര്‍ അന്തിയുറക്കം പുരപ്പുറത്തേക്ക് മാറ്റിയിട്ടുണ്ട്. ആന ശല്യത്തിന് എത്രയും വേഗം പരിഹാരം കാണണമെന്ന് വീട്ടുകാര്‍ ആവശ്യപ്പെട്ടു.