തലശ്ശേരി: പിണറായിയിലെ ബി.ജെ.പി പ്രവര്‍ത്തകന്‍ കൊല്ലനാണ്ടി വീട്ടില്‍ രമിത്തിനെ(26) കൊലപ്പെടുത്തിയ കേസില്‍ ഒരു സി.പി.എം പ്രവര്‍ത്തകന്‍ കൂടി അറസ്റ്റിലായി. പിണറായി ചേരിക്കലിലെ സൗഭാഗ്യയില്‍ കെ സായൂജിനെ(28)യാണ് സി.ഐ പ്രദീപന്‍ കണ്ണിപ്പൊയിലും സംഘവും പിടികൂടിയത്.
അഞ്ചാംപ്രതിയായ സായൂജ് സംഭവത്തിനു ശേഷം ബംഗളൂരുവില്‍ ഒളിവില്‍ കഴിയുകയായിരുന്നെന്നു പൊലിസ് പറഞ്ഞു. കേസില്‍ ആകെ പത്ത് പ്രതികളാണുള്ളത്. കൊലയാളി സംഘത്തെ രമിത്തിന്റെ വീടിനു സമീപം ബൈക്കില്‍ എത്തിച്ചതു സായൂജായിരുന്നെന്ന് അന്വേഷണസംഘം വ്യക്തമാക്കി. കേസില്‍ ഇതുവരെ എട്ടുപേര്‍ അറസ്റ്റിലായി. ജുഡീഷ്യല്‍ ഒന്നാംക്ലാസ് കോടതി പ്രതിയെ റിമാന്‍ഡ് ചെയ്തു.