ഹിദായ നഗര്‍: സൈനുല്‍ ഉലമാ ചെറുശ്ശേരി സൈനുദ്ദീന്‍ മുസ്‌ലിയാര്‍ അനുസ്മരണ പ്രാര്‍ഥനാ സദസ് ഇന്ന് വൈകിട്ട് ദാറുല്‍ഹുദാ ഇസ്‌ലാമിക് സര്‍വകലാശാല കാംപസില്‍ നടക്കും.
ദീര്‍ഘകാലം സമസ്തയുടെ  ജനറല്‍ സെക്രട്ടറിയും  ദാറുല്‍ഹുദാ പ്രോ.ചാന്‍സലറും നിരവധി മഹല്ലുകളുടെ ഖാസിയുമായിരുന്ന ചെറുശ്ശേരി സൈനുദ്ദീന്‍ മുസ്‌ലിയാരുടെ വിയോഗത്തിന്റെ ഒന്നാം ആണ്ടിനോടനുബന്ധിച്ച് വിപുലമായ അനുസ്മരണ പ്രാര്‍ഥനാ സദസാണ്  ഇന്ന് വാഴ്‌സിറ്റി കാംപസില്‍ നടക്കുന്നത്.
വൈകിട്ട് ഏഴിന് മഗ്‌രിബ് നിസ്‌കാരാനന്തരം കൂട്ടസിയാറത്ത് നടക്കും. തുടര്‍ന്ന്  അനുസ്മരണ പ്രാര്‍ഥനാ സംഗമം ചാന്‍സലര്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. സമസ്ത പ്രസിഡന്റ് സയ്യിദ് ജിഫ്്‌രി മുത്തുക്കോയ തങ്ങള്‍ അധ്യക്ഷനാകും.
സമസ്ത ജന. സെക്രട്ടറി കെ. ആലിക്കുട്ടി മുസ്‌ലിയാര്‍, വിദ്യാഭ്യാസ ബോര്‍ഡ് ജന.സെക്രട്ടറി എം.ടി അബ്ദുല്ല മുസ്‌ലിയാര്‍, സയ്യിദ് സ്വാദിഖലി ശിഹാബ് തങ്ങള്‍, ദാറുല്‍ുഹുദാ വൈസ് ചാന്‍സലര്‍ ഡോ. ബഹാഉദ്ദീന്‍ മുഹമ്മദ് നദ്‌വി സംസാരിക്കും. അബ്ദുസ്സമദ് പൂക്കോട്ടൂര്‍ അനുസ്മരണപ്രഭാഷണം നടത്തും.  പ്രാര്‍ഥനാ സദസിന് കോഴിക്കോട് ഖാസിയും ദാറുല്‍ഹുദാ വൈസ് പ്രസിഡന്റുമായ സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം നല്‍കും.
ചടങ്ങില്‍ സമസ്ത മുശാവറ അംഗങ്ങളും നിരവധി പണ്ഡിതരും സയ്യിദരും സംബന്ധിക്കും. ഉച്ചയ്ക്ക് ശേഷം ദാറുല്‍ഹുദാ സ്റ്റുഡന്‍സ് യൂനിയന്‍ സംഘടിപ്പിക്കുന്ന അനുസ്മരണ സംഗമത്തില്‍ സമസ്ത മുശാവറ അംഗം വി. മൂസക്കോയ മുസ്‌ലിയാര്‍ സംസാരിക്കും.