കൊല്‍ക്കത്ത: ഐലീഗിലെ സൂപ്പര്‍ പോരാട്ടങ്ങളില്‍ വമ്പന്‍മാര്‍ക്ക് ജയം. ഷില്ലോങ് ലജോങ് എതിരില്ലാത്ത ഒരു ഗോളിന് ചര്‍ച്ചില്‍ ബ്രദേഴ്‌സിനെയും ഈസ്റ്റ് ബംഗാള്‍ എതിരില്ലാത്ത മൂന്നു ഗോളിന് ചെന്നൈ സിറ്റിയെയുമാണ് പരാജയപ്പെടുത്തിയത്. മറ്റൊരു മത്സരത്തില്‍ കരുത്തരായ ബംഗളൂരുവിനെ 2-2ന് ശിവാജിയന്‍സ് സമനിലയില്‍ കുരുക്കി.

ചര്‍ച്ചിലിനെതിരേ തകര്‍പ്പന്‍ പ്രകടനമാണ് ഷില്ലോങ് പുറത്തെടുത്തത്. മികച്ച ഗോളവസരങ്ങള്‍ ഒരുക്കിയ ടീമിന് ഫിനിഷിങിലെ പോരായ്മയെ തുടര്‍ന്ന് ആദ്യ പകുതിയില്‍ ഗോള്‍ നേടാന്‍ സാധിച്ചില്ല. രണ്ടാം പകുതിയില്‍ ഇതിന് ടീം പരിഹാരം കണ്ടു. 51ാം മിനുട്ടില്‍ ഡിപാന്‍ഡയാണ് ഷില്ലോങിന്റെ വിജയ ഗോള്‍ നേടിയത്.

ചെന്നൈക്കെതിരേ ഗോള്‍രഹിതമായ ആദ്യപകുതിക്ക് ശേഷമാണ് ഈസ്റ്റ് ബംഗാള്‍ മൂന്നു ഗോളുകള്‍ സ്‌കോര്‍ ചെയ്തത്. 50ാം മിനുട്ടില്‍ വെഡ്‌സന്‍ അന്‍സെല്‍മെ ഈസ്റ്റ് ബംഗാളിന്റെ അക്കൗണ്ട് തുറന്നു. 75ാം മിനുട്ടില്‍ വില്ലിസ് പ്ലാസ സ്‌കോര്‍ ഉയര്‍ത്തി. മത്സരത്തിന്റ അധിക സമയത്ത് ലാല്‍റിന്‍ഡികെ റാല്‍ട്ടെ മൂന്നാം ഗോളും നേടിയതോടെ ചെന്നൈ സമ്പൂര്‍ണ പരാജയം ഉറപ്പിക്കുകയായിരുന്നു.
ശിവാജിയന്‍സിനെതിരേ രണ്ടു ഗോളിന് പിന്നിട്ട് നിന്ന ശേഷമാണ് ബംഗളൂരു സമനില സ്വന്തമാക്കിയത്. ഹോളിചരണ്‍ നര്‍സരിയുടെ ഇരട്ട ഗോളിന്റെ മികവില്‍ മുന്നില്‍ നില്‍ക്കുകയായിരുന്നു ശിവാജിയന്‍സ്. 75ാം മിനുട്ടില്‍ സുനില്‍ ഛേത്രി നേടിയ ഗോളില്‍ മത്സരത്തില്‍ തിരിച്ചെത്തിയ ബംഗളൂരുവിന് സലാം രഞ്ചന്‍ സിങ് 90ാം മിനുട്ടില്‍ നേടിയ ഗോളാണ് സമനില നേടിക്കൊടുത്തത്.