കാഞ്ഞങ്ങാട്: വീട്ടിലെ അലമാരയുടെ വശത്തു തൂക്കിയിട്ട ബാഗില്‍ സൂക്ഷിച്ച സ്വര്‍ണാഭരണങ്ങളും പണവും കാണാതായതായി പരാതി. നോര്‍ത്ത് കോട്ടച്ചേരി തുളിച്ചേരിയിലെ കരുണാകരന്റെ വീട്ടില്‍ നിന്നാണു സ്വര്‍ണം നഷ്ടപ്പെട്ടത്. മുക്കാല്‍ പവന്റെ രണ്ടു വളകള്‍, അരപ്പവന്‍ മോതിരം, വെള്ളി പാദസരം, 3000 രൂപ എന്നിവയാണ് കഴിഞ്ഞ മാസം 26നു കാണാതായത്. ജനലിലൂടെ എടുത്തു കൊണ്ടുപോയെന്നാണ് സംശയിക്കുന്നത്. ഈ ദിവസം ഒരു സ്ത്രീ വീട്ടുപരിസരത്തു കൂടി നടന്നു പോകുന്നത് കണ്ടിരുന്നു. ഇവരെ കുറിച്ച് അന്വേഷണം നടത്തിയെങ്കിലും കണ്ടെത്താനായില്ല. തുടര്‍ന്നാണ് ഹൊസ്ദുര്‍ഗ് പൊലിസില്‍ പരാതി നല്‍കിയത്.