ന്യൂഡല്‍ഹി: ജനഗണമന ദേശീയഗാനവും വന്ദേമാതരം ദേശീയഗീതവുമായതിന്റെ ചരിത്ര പശ്ചാത്തലം എന്താണെന്ന് വെളിപ്പെടുത്താന്‍ മുഖ്യ വിവരാവകാശ കമ്മിഷണര്‍ പ്രധാനമന്ത്രിയുടെ ഓഫിസിനോടാവശ്യപ്പെട്ടു. ഇതുസംബന്ധിച്ച് നല്‍കിയ അപേക്ഷ പി.എം.ഒ തിരിച്ചയച്ചതിനെ തുടര്‍ന്നാണ് നടപടി.

തങ്ങളുടെ അധികാര പരിധിയില്‍ ഇതു വരുന്നില്ലെന്നറിയിച്ചാണ് ഹരീന്ദര്‍ ധിംഗ്ര എന്നയാള്‍ നല്‍കിയ അപേക്ഷ പി.എം.ഒ തള്ളിയത്. ദേശീയ പ്രാധാന്യമുള്ള ഈ പ്രശ്‌നത്തിനു മറുപടി നല്‍കാതെ ഉത്തരവാദിത്തത്തില്‍ നിന്നൊഴിയാനുള്ള ശ്രമം ആശ്ചര്യകരമാണെന്ന് മുഖ്യ വിവരാവകാശ കമ്മിഷണര്‍ ശ്രീധര്‍ ആചാര്യലു പറഞ്ഞു.

ദേശീയഗാനത്തെ അനാദരിക്കുന്നതിന്റെ പേരില്‍ ശിക്ഷ വിധിക്കും മുന്‍പു ദേശീയഗാനത്തിന്റെ ചരിത്രപ്രാധാന്യവും മഹത്വവും ജനങ്ങളെ ബോധ്യപ്പെടേണ്ടതുണ്ടെന്നും അദ്ദേഹം പറഞ്ഞു.