ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ മുന്‍ ചാംപ്യന്‍മാരായ ചെല്‍സിയും ലെയ്സ്റ്റര്‍ സിറ്റിയും നേര്‍ക്കുനേര്‍ വന്ന പോരാട്ടം ഗോള്‍രഹിത സമനില. സ്വന്തം തട്ടകത്തിലാണ് ചെല്‍സി ഗോളില്ലാതെ കളം വിട്ടത്. മറ്റ് മത്സരങ്ങളില്‍ വെസ്റ്റ് ഹാം യുനൈറ്റഡ് 4-1ന് ഹഡ്ഡേഴ്‌സ്ഫീല്‍ഡിനെ തകര്‍ത്തു.
പരാജയമറിയാതെ നാലാം മത്സരം പൂര്‍ത്തിയാക്കിയ വെസ്റ്റ് ഹാം പോയിന്റ് പട്ടികയില്‍ 11ാം സ്ഥാനത്തേക്ക് കുതിച്ചെത്തുകയും ചെയ്തു. വെസ്റ്റ് ബ്രോംവിച് 2-0ത്തിന് ബ്രൈറ്റനെയും ക്രിസ്റ്റല്‍ പാലസ് 1-0ത്തിന ബേണ്‍ലിയേയും തകര്‍ത്തു. ന്യൂകാസില്‍- സ്വാന്‍സീ സിറ്റി മത്സരം 1-1നും വാട്‌പോര്‍ഡ്- സതാംപ്ടന്‍ മത്സരം 2-2നും സമനില.

റയല്‍ മാഡ്രിഡ് ഞെട്ടി

മാഡ്രിഡ്: സ്പാനിഷ് ലാ ലിഗ പോരാട്ടത്തില്‍ നിലവിലെ ചാംപ്യന്‍മാരായ റയല്‍ മാഡ്രിഡിന് സ്വന്തം തട്ടകമായ സാന്റിയാഗോ ബെര്‍ണാബുവില്‍ ഞെട്ടിക്കുന്ന തോല്‍വി. അവസാന നിമിഷത്തില്‍ പാബ്ലോ ഫോര്‍ണാലസ് നേടിയ ഗോളില്‍ വിയ്യാറല്‍ 1-0ത്തിന് റയലിനെ അട്ടിമറിച്ചു.
മറ്റ് മത്സരങ്ങളില്‍ ഗെറ്റാഫെ 1-0ത്തിന് മാലഗയെ വീഴ്ത്തിയപ്പോള്‍ ജിറോന മറുപടിയില്ലാത്ത ആറ് ഗോളുകള്‍ക്ക് ലാസ് പല്‍മാസിനെ തകര്‍ത്തു.

ബയേണിന് വിജയം
മ്യൂണിക്ക്: ജര്‍മന്‍ ബുണ്ടസ് ലീഗ പോരാട്ടത്തില്‍ ബയേണ്‍ മ്യൂണിക്ക് എവേ പോരാട്ടത്തില്‍ ബയര്‍ ലെവര്‍കൂസനെ 3-1ന് വീഴ്ത്തി. ലീഗില്‍ തുടര്‍ വിജയങ്ങളുമായി ലെവര്‍കൂസന്‍ മുന്നേറുന്നത് തടഞ്ഞ നിലവിലെ ചാംപ്യന്‍മാര്‍ പോയിന്റ് പട്ടികയില്‍ സുരക്ഷിതരായി മുന്നേറുന്നു. ജാവി മാര്‍ട്ടിനസ്, റിബറി, ജെയിംസ് റോഡ്രിഗസ് എന്നിവരാണ് ബാവേറിയന്‍സിനായി വല ചലിപ്പിച്ചത്. മറ്റ് മത്സരങ്ങളില്‍ ഓഗ്‌സബര്‍ഗ് 1-0ത്തിന് ഹാംബര്‍ഗറിനേയും ഹന്നോവര്‍ 3-2ന് മെയ്ന്‍സിനേയും സ്റ്റുര്‍ട്ട്ഗര്‍ട് 1-0ത്തിന് ഹെര്‍ത്തയേയും കീഴടക്കി. വെര്‍ഡര്‍ ബ്രെമന്‍- ഹോഫെന്‍ഹെയിം, ഫ്രാങ്ക്ഫര്‍ട്- ഫ്രീബര്‍ഗ് പോരാട്ടങ്ങള്‍ 1-1ന് സമനില.

ചെന്നൈയിന് ജയം
ചെന്നൈ: ഇന്ത്യന്‍ സൂപ്പര്‍ ലീഗില്‍ ചെന്നൈയിന്‍ എഫ്.സിക്ക് സ്വന്തം തട്ടകത്തില്‍ വിജയം. മറുപടിയില്ലാത്ത ഒറ്റ ഗോളിന് അവര്‍ എഫ്.സി പൂനെ സിറ്റിയെ വീഴ്ത്തി. ആദ്യ പകുതിയില്‍ ലഭിച്ച പെനാല്‍റ്റി നഷ്ടപ്പെടുത്തിയ ശേഷമാണ് 83ാം മിനുട്ടില്‍ നെല്‍സന്‍ നേടിയ ഗോളില്‍ അവര്‍ വിജയം സ്വന്തമാക്കിയത്.