പീരുമേട്: പീരുമേട് എക്‌സൈസ് സര്‍ക്കിള്‍ ഓഫിസിന്റെ പരിധിയില്‍ വിവിധ ഇടങ്ങളിലായി കഞ്ചാവു വേട്ട. കുമളിയില്‍ നിന്നും കഞ്ചാവ് കടത്തിയ 17 കാരന്‍ ഉള്‍പ്പടെ 5 പേരെ എക്‌സൈസ് സംഘം അറസ്റ്റ് ചെയ്തു. കഞ്ചാവ് കടത്താനുപയോഗിച്ച രണ്ട് ബൈക്കുകളും കസ്റ്റഡിയില്‍ എടുത്തു.
130 ഗ്രാം കഞ്ചാവുമായി കുമളി ചെക്ക് പോസ്റ്റില്‍ പരിശോധനയ്ക്ക് നിര്‍ത്താതെ കടന്ന പെരുമ്പടപ്പുകരയില്‍ വെളളൂരി വീട്ടില്‍ നിവിന്‍ ആല്‍ബര്‍ട്ട് (22), കൊച്ചി ആക്വിനാസ് കോളജ് കരയില്‍ നികര്‍ത്തില്‍പറമ്പില്‍ വീട്ടില്‍ ഷെഫിന്‍ (26) എന്നിവരെ പീരുമേട് സര്‍ക്കിള്‍ ഇന്‍സ്‌പെക്ടര്‍ വി. എ സലീമും സംഘവും അറസ്റ്റ് ചെയ്തു.
പീരുമേട് പട്ടുമല നിവാസിയായ 17 കാരനെ 100 ഗ്രാം കഞ്ചാവുമായി വണ്ടിപ്പെരിയാര്‍ എക്‌സൈസ് ഇന്‍സ്‌പെക്ടര്‍ എസ്. ഷാജി പെരിയാര്‍ ഹെല്‍ത്ത് സെന്ററിനു സമീപത്തു നിന്നും അറസ്റ്റ് ചെയ്ത് തൊടുപുഴയിലെ ജുവനൈല്‍ കോടതിയില്‍ ഹാജരാക്കി.
120 ഗ്രാം കഞ്ചാവുമായി വന്ന എറണാകുളം സ്വദേശികളായ തട്ടാശ്ശേരി വീട്ടില്‍ സെബാസ്റ്റ്യന്‍ മകന്‍ ജോര്‍ജ് നിമോഷ് (23), മഠത്തിനായിതുണ്ടിയില്‍ വീട്ടില്‍ ലോഹിദാക്ഷന്‍ മകന്‍ അനില്‍ (23) എന്നീ യുവാക്കളെ കുമളി ചെക്ക് പോസ്റ്റില്‍ നിന്നും എക്‌സൈസ് സംഘം അറസ്റ്റ് ചെയ്തു.
കമ്പത്തു നിന്നും എറണാകുളത്തേയ്ക്ക് കഞ്ചാവുമായി പോവുകയായിരുന്നു ഈ യുവാക്കള്‍ .
കമ്പം കേന്ദ്രീകരിച്ച് കഞ്ചാവ് വില്‍ക്കുന്നവരില്‍ നിന്നാണ് കഞ്ചാവ് വാങ്ങിയതെന്ന് ഇവര്‍ പറയുന്നു. പ്രതികളെ പീരുമേട് കോടതിയില്‍ ഹാജരാക്കി.