കരുനാഗപ്പള്ളി: സ്‌കൂള്‍ കാംപസിനെ പ്ലാസ്റ്റിക് വിമുക്തമാക്കി മഷി പേനയുമായി സ്‌കൂള്‍ ശ്രദ്ധേയമാകുന്നു.
ആഴ്ചതോറും മാറി മാറി ഉപയോഗിക്കേണ്ടി വരുന്ന പ്ലാസ്റ്റിക്, ചില്ല് ബോള്‍ പേനകള്‍ക്കും മറ്റും വിടനല്‍കി സ്‌കൂളിലെ കുട്ടികളൊന്നാകെ മഷിപേന ഉപയോഗിച്ച് സ്‌കൂളിനെ ഹരിതസൗഹൃദ വിദ്യാലയമാക്കുന്നത് ഒരു പക്ഷെ സംസ്ഥാനത്ത് ഇത് ആദ്യമായിട്ടായിരിക്കാം.
ഓച്ചിറ ക്ലാപ്പന എസ്.വി.എച്ച് എസ്.എസ് സ്‌കൂളിലാണ് വേറിട്ട മാതൃക പദ്ധതി നടപ്പിലാക്കിയത്.രണ്ടായിരത്തോളം വരുന്ന വിദ്യാര്‍ഥികള്‍ പഠിക്കുന്ന സ്‌കൂളില്‍ ആഴ്ചയില്‍ ശരാശരി ഒരു പേന വീതം ഉപയോഗിച്ചാല്‍ പോലും പതിനായിരം പേനകള്‍ വേണ്ടിവരും കുട്ടികള്‍ക്ക്. വര്‍ഷത്തില്‍ ഒരു ലക്ഷത്തോളം പേനകള്‍ കാംപസിലും മറ്റ് പരിസരങ്ങളിലുമായി ഉപേക്ഷിക്കപ്പെടുന്നു. ഗുരുതരമായ ഈ മലിനീകരണത്തിനും അതുവഴി സൃഷ്ടിക്കപ്പെടുന്ന ആഗോള താപനം ഉള്‍പ്പെടേയുള്ള പ്രശ്‌നങ്ങള്‍ക്കും തങ്ങളാല്‍ കഴിയുന്ന പ്രതിരോധം സൃഷ്ടിക്കുകയാണ് ഈ സ്‌കൂളും വിദ്യാര്‍ഥികളും.
മുഴുവന്‍ കുട്ടികള്‍ക്കും സ്‌കൂളില്‍ മഷി പേനകള്‍ വിതരണം ചെയ്തത് കൂടാതെ മഷി നിറയ്ക്കാനുള്ള ഇങ്ക് ബൂത്തുകളും പ്രത്യേകം ഒരുക്കിയിട്ടുണ്ട്. വര്‍ഷം മുഴുവന്‍ ഒരു പേന ഉപയോഗിക്കാന്‍ കഴിയുന്ന തരത്തില്‍ മികവുറ്റ പേനകളാണ് കുട്ടികള്‍ക്ക് നല്‍കിയിട്ടുള്ളത്.
പദ്ധതിയുടെ ഉദ്ഘാടനം സ്‌കൂള്‍ അങ്കണത്തില്‍ നടന്ന ചടങ്ങില്‍ വെച്ച് കുട്ടികള്‍ക്ക് മഷിപ്പേനകള്‍ കൈമാറി ആര്‍.രാമചന്ദ്രന്‍ എം.എല്‍.എ നിര്‍വഹിച്ചു. സ്‌കൂള്‍ മാനേജര്‍ എന്‍ മുരളി അധ്യക്ഷനായി. പഞ്ചായത്ത് പ്രസിഡന്റ് എസ്.എം ഇക്ബാല്‍, എല്‍.കെ ദാസു ചടങ്ങില്‍ പങ്കെടുത്തു.