ആലപ്പുഴ: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ എസ്.ഐ ഉള്‍പ്പെടെ മൂന്നുപേര്‍ പിടിയില്‍. മാരാരിക്കുളം സ്റ്റേഷനിലെ പ്രൊബേഷനറി എസ്.ഐ ലൈജു, പീഡനത്തിനിരയായ പെണ്‍കുട്ടിയുടെ സുഹൃത്ത് വടക്കനാര്യാട് തെക്കേപ്പറമ്പില്‍ ജിന്‍മോന്‍ (22), ഇടനിലക്കാരിയുടെ സുഹൃത്തും ഡ്രൈവറുമായ പൊള്ളേത്തൈ സ്വദേശി യേശുദാസ് (28) എന്നിവരാണ് പിടിയിലായത്. ഇവരെ കോടതിയില്‍ ഹാജരാക്കി റിമാന്‍ഡ് ചെയ്തു.
കേസില്‍ സര്‍ക്കിള്‍ ഇന്‍സ്‌പെക്ടറും ഡിവൈ.എസ്.പിയും ഉള്‍പ്പെട്ടിട്ടുള്ളതായി അറിയുന്നു.
പൊലിസിന്റെ നിരീക്ഷണത്തിലുള്ള ഇവര്‍ ഉടന്‍ പിടിയിലാകുമെന്നാണ് സൂചന. അതിനിടെ, നേരത്തേ പിടിയിലായ ആലപ്പുഴ പൂങ്കാവ് സ്വദേശിയായ സീനിയര്‍ സിവില്‍ പൊലിസ് ഓഫിസര്‍ നെല്‍സന്‍ ചോദ്യംചെയ്യലില്‍ മാനസിക വിഭ്രാന്തി പ്രകടിപ്പിച്ചു. ആലപ്പുഴ ഡിവൈ.എസ്.പി പി.വി ബേബിക്കാണ് അന്വേഷണച്ചുമതല.