കല്‍പ്പറ്റ: ജില്ലയിലെ ഉള്‍നാടന്‍ മത്സ്യകൃഷിയുടെ വ്യാപനത്തിന് ഗ്രാമപഞ്ചായത്തുകള്‍ മത്സ്യകൃഷിക്കും അനുബന്ധ പ്രവൃത്തികള്‍ക്കും തുക വകയിരുത്തണമെന്ന് അക്വാകള്‍ച്ചര്‍ കോഡിനേറ്റേഴ്‌സ് വെല്‍ഫെയര്‍ ഫോറം ജില്ലാ കമ്മിറ്റി ഫിഷറീസ് മന്ത്രി ജെ മെഴ്‌സിക്കുട്ടിയമ്മക്ക് നല്‍കിയ നിവേദനത്തില്‍ ആവശ്യപ്പെട്ടു.
അലങ്കാരമത്സ്യം വളര്‍ത്തല്‍, മത്സ്യക്കുളങ്ങള്‍ക്കുള്ള സംരക്ഷണ വല എന്നീ പദ്ധതികള്‍ വയനാട് ജില്ലയിലെ മത്സ്യ കര്‍ഷകര്‍ക്ക് ഏറെ ഉപകാരപ്രദമാവും. ജില്ലയില്‍ നിലവില്‍ അയ്യായിരത്തോളം കര്‍ഷകര്‍ മത്സ്യകൃഷി ചെയ്തു വരുന്നുണ്ട്. കുളം കുഴിക്കുന്നതിനും നിലവിലെ കുളങ്ങള്‍ നവീകരിക്കുന്നതിനുമുള്ള ധനസഹായം കാലോചിതമായി പരിഷ്‌കരിക്കപ്പെട്ടാല്‍ കൂടുതല്‍ കര്‍ഷകരെ ഈ രംഗത്തേക്ക് കൊണ്ടു വരുന്നതിന് സാധിക്കും.
അതോടൊപ്പം തന്നെ വയലുകളില്‍ കുളം കുഴിക്കുന്നതിനുള്ള നിബന്ധനകളില്‍ ഇളവ് വരുത്തണം. അയ്യായിരത്തോളം വരുന്ന കര്‍ഷകരും മത്സ്യകൃഷി മേഖലയില്‍ നിരവധി പ്രവര്‍ത്തനങ്ങളും നല്ല രീതിയില്‍ നടന്നുവരുന്ന ജില്ലയിലെ ഓഫിസ് സംവിധാനത്തിലും, ജീവനക്കാരിലുള്ള എണ്ണക്കുറവും ജോലി ഭാരവും കണക്കിലെടുത്ത് നിലവിലെ അസിസ്റ്റന്റ് ഡയരക്ടര്‍ ഓഫിസ്, ഡെപ്യൂട്ടി ഡയരക്ടര്‍ ഓഫിസാക്കി ഉയര്‍ത്തി കൂടുതല്‍ സാങ്കേതിക വിഭാഗം ജീവനക്കാരെ നിയമിക്കണമെന്നും നിവേദനത്തില്‍ ആവശ്യപ്പെട്ടിട്ടുണ്ട്.
മത്സ്യകൃഷിയുടെ പ്രോത്സാഹനത്തിന് സര്‍ക്കാര്‍ നടപ്പിലാക്കിയ മത്സ്യ സമൃദ്ധി പദ്ധതിയുടെ ഭാഗമായുള്ള പഞ്ചായത്ത്തല മത്സ്യകര്‍ഷക ക്ലബ്ബുകള്‍ക്കും കര്‍ഷക സംഘങ്ങള്‍ക്കും പ്രവര്‍ത്തന മൂലധനം നല്‍കുക, ഉള്‍നാടന്‍ പ്രദേശങ്ങളില്‍ മത്സ്യകൃഷിയുടെ വ്യാപനത്തിനായി പ്രവര്‍ത്തിക്കുന്ന അക്വാകള്‍ച്ചര്‍ കോഡിനേറ്റര്‍മാരുടെ വേതനം കാലോചിതമായി പരിഷ്‌ക്കരിക്കണമെന്നും നിവേദനത്തിലൂടെ ആവശ്യപ്പെട്ടു. ജില്ലാ പ്രസിഡന്റ് ഷമീം പാറക്കണ്ടി, ജനറല്‍ സെക്രട്ടറി പി വിജയകുമാര്‍, ട്രഷറര്‍ വി.എ അഗസ്റ്റിന്‍, സി.എസ് ബെന്നി രാജി ഹരീന്ദ്രനാഥ്, മോളി പൗലോസ്, ഷോളി ജോര്‍ജ്, വി.എം സ്വപ്‌ന, ടി കെന്നഡി, ഗീത സജീവ്, അബൂബക്കര്‍ സാദിഖ്, പി.എ സണ്ണി, ടി.കെ പ്രസീത, പൂര്‍ണ്ണിമ മനോജ്, സിന്ധു ജോസ്, സിനി രാമചന്ദ്രന്‍, കെ.എസ് പ്രജിത, ലിസി ജോസഫ്, ടി.കെ ജ്യോസ്‌ന, ധന്യപോള്‍, സിജി മാത്യു, വി.ടി ഷെറിന്‍, രതീഷ്‌കുമാര്‍, എം സമൂന, സിന്ധുമോള്‍ തുടങ്ങിയവര്‍ ചേര്‍ന്നാണ് മന്ത്രിക്ക് നിവേദനം നല്‍കിയത്.