ന്യൂഡല്‍ഹി: മെഡിക്കല്‍ കോഴ വിവാദം സംബന്ധിച്ച് ഫോണ്‍ ചോര്‍ച്ചയില്‍ സി.ബി.ഐക്ക് നോട്ടിസ്. മുന്‍ ജഡ്ജിയും ഇടനിലക്കാരും തമ്മിലുള്ള സി.ബി.ഐ ശേഖരിച്ച ഫോണ്‍ സംഭാഷണം പുറത്തുവിട്ട സംഭവത്തിലാണ് നടപടി.ഈ മാസം 22നകം സി.ബി.ഐ മറുപടി നല്‍കണമെന്ന് ഡല്‍ഹി പ്രത്യേക സി.ബി.ഐ കോടതി നിര്‍ദ്ദേശിച്ചു.

പ്രതിയും മുന്‍ ജഡ്ജി ഐ.എം ഖുദുസി സമര്‍പ്പിച്ച ഹരജിയിലാണ് കോടതി നോട്ടിസയച്ചത്. ഖുദുസി മറ്റ് ജഡ്ജിമാരും ഇടനിലക്കാരുമായും നടത്തിയ സംഭാഷണമാണ് ചില മാധ്യമങ്ങള്‍ പുറത്തുവിട്ടത്.

2004 മുതല്‍ 2010 വരെ ഒഡീഷ ഹൈക്കോടതി ജഡ്ജിയായിരുന്ന ഖുദുസിയെ കഴിഞ്ഞ വര്‍ഷം സി.ബി.ഐ അറസ്റ്റ് ചെയ്തിരുന്നു. ലഖ്‌നൗ ആസ്ഥാനമായി പ്രവര്‍ത്തിക്കുന്ന പ്രസാദ് ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസിനു കീഴിലുള്ള മെഡിക്കല്‍ കോളജിന് പ്രവേശനാനുമതി ലഭിക്കുന്നതിന് സുപ്രിംകോടതിയിലെ ജഡ്ജിമാരെ സ്വാധീനിക്കാന്‍ ശ്രമിച്ചതുമായി ബന്ധപ്പെട്ട ആരോപണമാണ് കേസിനാധാരം.