വണ്ടൂര്‍: വാണിയമ്പലം ബാണാപുരം ദേവീ ക്ഷേത്രത്തിന് സമീപമുള്ള റബര്‍ തോട്ടത്തിലുണ്ടായ തീപിടിത്തത്തില്‍ വ്യാപക നഷ്ടം. ഇന്നലെ ഉച്ചക്ക് ഒരുമണിയോടെയാണ് ക്ഷേത്രത്തിന് താഴ്ഭാഗത്തുള്ള റബര്‍ തോട്ടത്തില്‍ തീപടര്‍ന്നത്. ശക്തമായ കാറ്റില്‍ തീ സമീപ സ്ഥലങ്ങളിലേക്കും പടര്‍ന്നുപിടിച്ചു. വൈകിട്ട് നാലരയോടെ തിരുവാലിയില്‍ നിന്നും അഗ്‌നിശമന സേന എത്തിയെങ്കിലും ചെങ്കുത്തായ മലവാരമായതിനാല്‍ സ്ഥലത്ത് എത്തിപ്പെടാനായില്ല. നാട്ടുകാരും ക്ഷേത്ര ഭാരവാഹികളും ഏറെ പണിപ്പെട്ടാണ് രാത്രിയോടെ തീ നിയന്ത്രണ വിധേയമാക്കിയത്. നിരവധി റബര്‍ മരങ്ങളും ഏക്കര്‍ കണക്കിന് സ്ഥലത്തെ അടിക്കാടുകളും കത്തിനശിച്ചു.