തിരുവനന്തപുരം: അര്‍ധരാത്രിയില്‍ ഒറ്റക്ക് യാത്ര ചെയ്യുകയായിരുന്ന വിദ്യാര്‍ഥിനിക്ക് വീടിനടുത്തുള്ള സ്‌റ്റോപ്പില്‍ ഇറങ്ങാനായി കെ.എസ്.ആര്‍.ടി.സിയുടെ 'മിന്നല്‍' ബസ് നിര്‍ത്താതിരുന്ന സംഭവത്തില്‍ കെ.എസ്.ആര്‍.ടി.സി എം.ഡി വനിതാ കമ്മിഷന് വിശദീകരണം നല്‍കി.
കണ്ടക്ടര്‍ക്കോ, ഡ്രൈവര്‍ക്കോ വീഴ്ച പറ്റിയിട്ടില്ല. സ്റ്റോപ്പില്ലാത്ത സ്ഥലങ്ങളില്‍ ബസ് നിര്‍ത്തി ആളെ ഇറക്കാനോ, കയറ്റാനോ ജീവനക്കാര്‍ക്ക് അധികാരമില്ല. റൂള്‍ 206 പ്രകാരം സൂപ്പര്‍ ഡീലക്‌സ് ശ്രേണിയില്‍പെട്ട മിന്നലിന് ജില്ലാ ആസ്ഥാനങ്ങളില്‍ മാത്രമാണ് സ്‌റ്റോപ്പ്. സുരക്ഷിതത്വം കണക്കിലെടുത്ത് രാത്രികാലങ്ങളില്‍ സ്ത്രീ യാത്രക്കാര്‍ ആവശ്യപ്പെടുന്ന സ്റ്റോപ്പുകളില്‍ നിര്‍ത്തിക്കൊടുക്കണമെന്ന വ്യവസ്ഥ ദേശസാല്‍കൃത സര്‍വിസായ മിന്നലിന് ബാധകമല്ലെന്നും എം.ഡി. എ.ഹേമചന്ദ്രന്‍ നല്‍കിയ വിശദീകരണത്തില്‍ പറയുന്നു. ഇക്കാര്യത്തില്‍ വിശദീകരണം നല്‍കണമെന്നും ജീവനക്കാര്‍ക്കെതിരേ നടപടിയെടുക്കണമെന്നും ആവശ്യപ്പെട്ട് വനിതാ കമ്മിഷന്‍ അധ്യക്ഷ എം.സി. ജോസഫൈന്‍ എം.ഡിക്ക് കത്ത് നല്‍കിയിരുന്നു. രണ്ടാഴ്ചക്കുള്ളില്‍ മറുപടി നല്‍കണമെന്നും കത്തില്‍ നിര്‍ദേശിച്ചിരുന്നു.
ബസ് നിര്‍ത്താതിരുന്ന സംഭവത്തില്‍ ജീവനക്കാര്‍ക്ക് വീഴ്ച സംഭവിച്ചിട്ടില്ലെന്നും അവരുടെ പേരിലുള്ള കേസ് ഒഴിവാക്കണമെന്നും പൊലിസിനോടും കെ.എസ്.ആര്‍.ടി.സി ആവശ്യപ്പെട്ടിട്ടുണ്ട്. ഇതുസംബന്ധിച്ച് കേസെടുത്തിരിക്കുന്ന ചോമ്പാല എസ്.ഐക്ക് കത്ത് നല്‍കാന്‍ പാലാ ഡിപ്പോ ഡയറക്ടര്‍ക്ക് എം.ഡി നിര്‍ദേശവും നല്‍കി.