തിരുവനന്തപുരം: ഇന്ധനവില വര്‍ധനവിനെതിരേ നാളെ നടക്കുന്ന മോട്ടോര്‍ വാഹന പണിമുടക്ക് വിജയിപ്പിക്കണമെന്ന് സി.പി.എം സംസ്ഥാന സെക്രട്ടേറിയറ്റ്.
മോദി സര്‍ക്കാര്‍ അധികാരത്തിലെത്തിയ 2014 മെയില്‍ ക്രൂഡോയിലിന് ബാരലിന് 120 ഡോളറായിരുന്നു വില. അന്ന് ഡീസലിന് 49.57 രൂപയായിരുന്നു. എന്നാലിന്ന് ക്രൂഡോയിലിന് അന്താരാഷ്ട്ര മാര്‍ക്കറ്റില്‍ ബാരലിന് 70 ഡോളര്‍ മാത്രമുള്ളപ്പോള്‍ ഡീസലിന്റെ വില 68 രൂപയാണ്.
ഓരോ ദിവസവും വില വര്‍ധിപ്പിക്കാന്‍ എണ്ണക്കമ്പനികള്‍ക്ക് കേന്ദ്രസര്‍ക്കാര്‍ അനുവാദം നല്‍കിയതിനെതിരേ കടുത്ത പ്രതിഷേധമാണ് ഉയരുന്നത്. പെട്രോളിന്റെ വില നിര്‍ണയാധികാരം എണ്ണക്കമ്പനികള്‍ക്ക് നല്‍കിയ യു.പി.എ സര്‍ക്കാരിന്റെ നയങ്ങള്‍ക്കെതിരേ ശക്തമായി പ്രതിഷേധിക്കുകയും അധികാരത്തില്‍വന്നാല്‍ എടുത്തുകളയുമെന്ന് പ്രഖ്യാപിക്കുകയും ചെയ്ത പാര്‍ട്ടിയാണ് ബി.ജെ.പി. അതേ ബി.ജെ.പിയാണ് ദിവസംതോറും ഡീസലിന്റെയും പെട്രോളിന്റെയും വില വര്‍ധിപ്പിക്കാനുള്ള സൗകര്യം എണ്ണക്കമ്പനികള്‍ക്ക് നല്‍കിയത്. ദിവസംതോറുമുള്ള വില വര്‍ധനവ് വിലക്കയറ്റം രൂക്ഷമാക്കിയിരിക്കുകയാണെന്നും സംസ്ഥാന സെക്രട്ടേറിയറ്റ് പ്രസ്താവനയില്‍ വ്യക്തമാക്കി.