ചേര്‍ത്തല: പൊലിസ് മാനുവല്‍ പരീക്ഷയില്‍ ചേര്‍ത്തല ഡിവൈ.എസ്.പിയുടെ പരിധിയിലുള്ള സ്റ്റേഷനുകളില്‍ നിന്ന് എഴുതിയ 120 പേരും വിജയിച്ചു.പൊലിസ് നിയമങ്ങള്‍ അറിയാത്ത സേനാംഗങ്ങള്‍ക്ക് ഡിവൈഎസ്പിയാണ് മാനുവല്‍ പഠന പരീക്ഷ നടത്തിയത്.  
 ചേര്‍ത്തല ഡിവൈ.എസ്.പിയുടെ പരിധിയിലുള്ള സ്റ്റേഷനുകളില്‍ ഇന്നലെ ഡ്യൂട്ടിയിലുണ്ടായിരുന്ന 120 പേരാണ് പൊലീസ് മാനുവല്‍ കാണാപാഠം പഠിച്ച് ഉദ്യോഗസ്ഥന് മുന്നില്‍ എഴുതിനല്‍കിയത്.
ബാക്കിയുള്ളവര്‍ക്ക് അടുത്ത വെള്ളി പരേഡിന് ശേഷം വീണ്ടും പരീക്ഷ നടത്തും. പൊലിസ് മാനുവല്‍ പ്രകാരം പ്രിന്‍സിപ്പല്‍ എസ്.ഐ മുതല്‍ സിവില്‍ പൊലിസ് ഓഫിസര്‍ വരെയുള്ളവരുടെ ചുമതലകള്‍ എന്തെന്ന് പഠിച്ചശേഷം പരേഡ് കഴിഞ്ഞ് ഡിവൈ.എസ്.പിക്ക് മുന്നില്‍ എഴുതി കാണിക്കുവാനായിരുന്നു കഴിഞ്ഞ ദിവസം നല്‍കിയ നിര്‍ദേശം.
 എന്നാല്‍ ഇതിന് എതിരെ പൊലിസ് അസോസിയേഷന്‍ രംഗത്തു വന്നെങ്കിലും തീരുമാനം പിന്‍വലിക്കുവാന്‍ ഉദ്യോഗസ്ഥന്‍ തയ്യാറായില്ല.
ജനമൈത്രി പൊലിസ് സംവിധാനം കാര്യക്ഷമമായി നടപ്പിലാക്കുന്നതിന് പൊലിസ് സേനയെ സജ്ജരാക്കുന്നതിന്റെ ഭാഗമാണിതെന്ന് ഡിവൈ.എസ്.പി വൈ.ആര്‍ റസ്റ്റം പറഞ്ഞു.