കോഴിക്കോട്: റിപ്പബ്ലിക് ദിനത്തില്‍ എസ്.കെ.എസ്.എസ്.എഫിന്റെ ആഭിമുഖ്യത്തില്‍ രാജ്യത്തിനകത്തും പുറത്തുമായി 61 കേന്ദ്രങ്ങളില്‍ മനുഷ്യ ജാലിക സംഘടിപ്പിക്കും. 'രാഷ്ട്ര രക്ഷക്ക് സൗഹൃദത്തിന്റെ കരുതല്‍' എന്ന സന്ദേശവുമായി സംഘടന 11ാം തവണയാണ് ഈ വര്‍ഷവും പരിപാടി സംഘടിപ്പിക്കുന്നത്. കേരളത്തില്‍ 14 കേന്ദ്രങ്ങളിലും ഡല്‍ഹി,ബംഗാള്‍,അസം, മഹാരാഷ്ട്ര, അന്ധ്രപ്രദേശ്, തെലുങ്കാന, കര്‍ണാടക,തമിഴ്‌നാട്, ലക്ഷദ്വീപ് എന്നീ സംസ്ഥാനങ്ങളില്‍ 17 കേന്ദ്രങ്ങളിലും മനുഷ്യ ജാലിക നടക്കും. സഊദി, യു.എ.ഇ, ഖത്തര്‍, ബഹ്‌റൈന്‍,ഒമാന്‍, കുവൈത്ത് എന്നീ രാജ്യങ്ങളില്‍ മുപ്പത് കേന്ദ്രങ്ങളിലും പരിപാടി നടക്കും. ദേശീയോദ്ഗ്രഥന ഗാനം, പ്രതിജ്ഞ, പ്രമേയ പ്രഭാഷണം എന്നിവ ഏകീകൃത സ്വഭാവത്തോടെയാണ് നടക്കുക. കേരളം, കര്‍ണാടക, തമിഴ്‌നാട് എന്നിവിടങ്ങളില്‍ ബഹുജന റാലിയും നടക്കുന്നുണ്ട്. എല്ലാ മതവിഭാഗങ്ങളുടേയും പൂര്‍ണ പങ്കാളിത്തത്തോടെ ഇന്ത്യയിലും വിദേശത്തും നടക്കുന്ന ശ്രദ്ധേയമായ റിപ്പബ്ലിക് ദിനാഘോഷമാണ് മനുഷ്യ ജാലിക . ഇന്ന് വൈകിട്ട്‌നാലിന് കേരളത്തിലെ വിവിധ കേന്ദ്രങ്ങളില്‍ നടക്കുന്ന മനുഷ്യജാലികയില്‍ പ്രമുഖ സംഘടനാ നേതാക്കള്‍ പ്രമേയ പ്രഭാഷണം നടത്തും. സ്മസ്ത നേതാക്കളും മന്ത്രിമാരും ജനപ്രതിനിധികളും വിവിധ സമുദായ പ്രതിനിധികളും സംബന്ധിക്കും.