താമരശേരി: മൈലള്ളാംപാറ സെന്റ്‌തോമസ് യു.പി സ്‌കൂളിനു സമീപം മരങ്ങള്‍ മുറിച്ചുമാറ്റിയ തോട്ടത്തിന് തീപിടിച്ചു. കോഴിക്കോട് സ്വദേശിയുടെ 10 ഏക്കറോളം വരുന്ന സ്ഥലത്താണ് തീപിടിത്തമുണ്ടായത്.
ശനിയാഴ്ച പുലര്‍ച്ചെ നാലോടെയാണ് സംഭവം. തീ വനത്തിലേക്ക് പടര്‍ന്നു കയറി. തൊട്ടടുത്ത പറമ്പുകളിലേക്ക് പടര്‍ന്ന തീ നാട്ടുകാര്‍ തല്ലിക്കെടുത്തിയും അതിര്‍ത്തി വെട്ടിത്തെളിച്ചും നിയന്ത്രിക്കുകയായിരുന്നു.
മുക്കത്തു നിന്ന് ഫയര്‍ഫോഴ്‌സും താമരശേരി ഫോറസ്റ്റ് റേഞ്ച് ഓഫിസില്‍ നിന്ന് ഫോറസ്റ്റ് ഉദ്യോഗസ്ഥരുമെത്തി വനത്തിലേക്ക് പടര്‍ന്ന തീ അണയ്ക്കാന്‍ ശ്രമിച്ചെങ്കിലും നിയന്ത്രണ വിധേയമായിട്ടില്ല. പുലര്‍ച്ചെ തുടങ്ങിയ തീപിടിത്തം രാത്രി വൈകിയും തുടരുകയാണ്. മൈലള്ളാംപാറ സെന്റ് തോമസ് പള്ളി വികാരി ഫാ. ജോസ് കനാച്ചിക്കുഴിയുടെ നേതൃത്വത്തില്‍ ബാബുകണ്ടംപാലം, മനോജ് തേവടിയില്‍, ജോബി മാനാട്ട്, സുരേഷ്, വിനോദ് സക്കറിയ തുടങ്ങിയവര്‍ ചേര്‍ന്നാണ് പറമ്പുകളിലേക്ക് തീ പടരാതെ നിയന്ത്രിച്ചത്.