ന്യൂഡല്‍ഹി: സാമ്പത്തിക കുറ്റകൃത്യക്കേസില്‍ അന്വേഷണം നേരിടുന്ന ഐ.പി.എല്‍ മുന്‍ മേധാവി ലളിത് മോദിയെ ഇന്ത്യയിലേയ്ക്കു തിരികെ കൊണ്ടുവരുന്നതിനായി കേന്ദ്ര ഏജന്‍സികള്‍ ഒരിക്കല്‍ക്കൂടി ഇന്റര്‍പോളിനെ സമീപിക്കും. ലളിത് മോദിക്കും മറ്റ് ഏഴു പേര്‍ക്കുമെതിരേ 2010ല്‍ കേസെടുത്തിരുന്നുവെന്നും ഇതുസംബന്ധിച്ചു തെളിവുകള്‍ ശേഖരിച്ചുവരികയാണെന്നും ചെന്നൈ ക്രൈംബ്രാഞ്ച് ഓഫിസ് കേന്ദ്ര ധനകാര്യമന്ത്രാലയത്തെ അറിയിച്ചു.
കള്ളപ്പണം വെളുപ്പിക്കലുമായി ബന്ധപ്പെട്ട കേസാണ് ലളിത് മോദിക്കെതിരേ ചുമത്തിയിരിക്കുന്നത്. സാമ്പത്തിക കുറ്റകൃത്യങ്ങള്‍ അന്വേഷിക്കുന്ന എന്‍ഫോഴ്‌സ്‌മെന്റ് ഡയറക്ടറേറ്റിന്റെ ആവശ്യപ്രകാരമാണ് ക്രൈംബ്രാഞ്ചിന്റെ നടപടികള്‍. ലളിത് മോദിക്കെതിരേ ഇന്റര്‍പോള്‍ നേരത്തെ റെഡ് കോര്‍ണര്‍ നോട്ടിസ് പുറപ്പെടുവിച്ചിരുന്നു. കുറ്റവാളിയെ കണ്ടെത്താനും അറസ്റ്റ് ചെയ്യാനും അനുവാദം നല്‍കുന്നതാണ് റെഡ് കോര്‍ണര്‍ നോട്ടിസ്. ഇന്ത്യന്‍ പ്രീമിയര്‍ ലീഗിന്റെ (ഐ.പി.എല്‍) പ്രഥമ മേധാവിയായ ലളിത് മോദിയെ, സാമ്പത്തിക ക്രമക്കേടിനെ തുടര്‍ന്ന് 2010ല്‍ സ്ഥാനത്തുനിന്നു നീക്കിയിരുന്നു. ഇതിനു പിന്നാലെ അറസ്റ്റ് ഭയന്നു ബ്രിട്ടനില്‍ ഒളിവില്‍ കഴിയുകയാണ് അദ്ദേഹം. റെഡ് കോര്‍ണര്‍ നോട്ടിസ് പുറപ്പെടുവിച്ചെങ്കിലും ഇതുസംബന്ധിച്ചു പിന്നീട് പുരോഗതിയുണ്ടാകാതിരുന്നതിനെ തുടര്‍ന്നാണ് വീണ്ടും ഇന്റര്‍പോളിനെ സമീപിക്കാന്‍ ഇ.ഡി ഒരുങ്ങുന്നത്.
ലളിത് മോദിയെ വിദേശത്തേക്കു കടക്കുന്നതിനു വിദേശകാര്യമന്ത്രി സുഷമാ സ്വരാജും രാജസ്ഥാന്‍ മുഖ്യമന്ത്രി വസുന്ദരരാജ സിന്ധ്യയും നിയമവിരുദ്ധമായി സഹായിച്ചതായി റിപ്പോര്‍ട്ടുണ്ടായിരുന്നു.